हैदराबाद : ट्रेंट बोल्टने (२६ धावांत ४ बळी) प्रथम झटके दिल्यानंतर रोहित शर्माच्या (४६ चेंडूंत ७० धावा) अर्धशतकाचा तडाखा सनरायजर्स हैदराबादला बसला. त्यामुळे आयपीएलमध्ये बुधवारी झालेल्या सामन्यात मुंबई इंडियन्सने ७ गडी आणि २६ चेंडू राखून धडाकेबाज विजय मिळवला. सलग चौथ्या विजयामुळे मुंबईने गुणतालिकेत तिसऱ्या स्थानी झेप घेतली. बोल्ट सामनावीर ठरला.
राजीव गांधी स्टेडियमवर झालेल्या या लढतीत मुंबईचा कर्णधार हार्दिक पंड्याने नाणेफेक जिंकून गोलंदाजी स्वीकारली. बोल्ट व दीपक चहर यांच्या वेगवान जोडीने पॉवरप्लेमध्येच हैदराबादची ५ बाद ३५ अशी अवस्था केली. बोल्टने अभिषेक शर्मा (८), ट्रेव्हिस हेड (०) यांना बाद केले, तर चहरने इशान किशन (१) व नितीश रेड्डीला (२) माघारी पाठवले. त्यानंतर हेनरिच क्लासेन (७१) व अभिनव मनोहर (४३) यांनी ९९ धावांची भागीदारी रचून संघाला सन्मानजनक धावसंख्या उभारून दिली. जसप्रीत बुमराने क्लासेनचा अडसर दूर केला, तर २०व्या षटकात बोल्टने अभिनव व पॅट कमिन्सला बाद केले.
लक्ष्याचा पाठलाग करताना मुंबईने १५.४ षटकांत ३ फलंदाजांच्या मोबदल्यात विजय मिळवला. रायन रिकेल्टन (११) स्वस्तात बाद झाला. मात्र रोहितने ८ चौकार व ३ षटकारांसह ४६ चेंडूंत ७० धावा फटकावल्या. विल जॅक्सने २२ धावांचे योगदान दिले. रोहित व सूर्यकुमार यादव (नाबाद ४०) यांनी तिसऱ्या विकेटसाठी ५३ धावांची भागीदारी रचली. रोहित बाद झाल्यावर सूर्यकुमारने १६व्या षटकात विजयी चौकार लगावला.
दोन्ही संघांच्या खेळाडूंकडून आदरांजली
मुंबई-हैदराबाद यांच्यातील लढत सुरू होण्यापूर्वी दोन्ही संघांतील खेळाडूंनी काही क्षण उभे राहून पहलगाम येथील दहशतवादी हल्ल्यात मृत्यमुखी पावलेल्या नागरिकांना आदरांजली वाहिली. त्याशिवाय दोन्ही संघांतील खेळाडूंनी दंडाभोवती काळ्या रंगाच्या फिती बांधल्या. बीसीसीआयनेसुद्धा याविषयी ट्वीट केले. तसेच या घटनेचा तीव्र निषेध करताना बुधवारी सामन्यादरम्यान डीजेवर गाणी लावण्यात मनाई करण्यात आली. तसेच फटाक्यांची आतषबाजी आणि चिअरलीडर्स यांच्यावरही या लढतीसाठी बंदी घालण्यात आली होती.
