

मुंबई : आयपीएल २०२७ च्या हंगामापूर्वी खेळाडूंच्या अदलाबदलीला वेग आला असून, सनरायझर्स हैदराबादने अनुभवी वेगवान गोलंदाज हर्षल पटेलला गुजरात टायटन्सकडे पाठवण्याचा निर्णय घेतला आहे. या व्यवहारात गुजरात टायटन्स हर्षलला ४ कोटी रुपयांमध्ये आपल्या संघात सामील करून घेणार आहे.
विशेष म्हणजे, २०२५च्या मेगा लिलावात हैदराबादने त्याच्यासाठी मोजलेल्या ८ कोटी रुपयांच्या तुलनेत ही रक्कम निम्मी आहे. दोन्ही संघांमध्ये रोख रकमेच्या स्वरूपात हा व्यवहार निश्चित झाला आहे. या व्यवहारानुसार गुजरात टायटन्सच्या आगामी लिलावातील पर्समधून ४ कोटी रुपये वजा केले जाणार आहेत.
दोन वेळा पर्पल कॅपचा मान
३५ वर्षीय हर्षल हा आयपीएलमधील अनुभवी गोलंदाज असून त्याने आपल्या कारकिर्दीत दोन वेळा पर्पल कॅप पटकावली आहे. २०२१ मध्ये बेंगळुरूकडून खेळताना त्याने ३२ विकेट्स घेतल्या होत्या. त्यानंतर २०२४ मध्ये पंजाबकडून खेळताना २४ विकेट्स मिळवत पुन्हा सर्वाधिक बळी घेणारा गोलंदाज ठरला.
२०२५ च्या मेगा लिलावात हैदराबादने त्याला ८ कोटी रुपये मोजून संघात घेतले होते. मात्र संघाने युवा वेगवान गोलंदाज प्रफुल्ल हिंगे आणि साकिब हुसेन यांना अधिक पसंती दिली. त्यामुळे हर्षलला केवळ पाच सामने खेळण्याची संधी मिळाली. या पाच सामन्यांत त्याला एकही विकेट मिळवता आली नाही. त्याचा इकॉनॉमी रेटही १०.८२ इतका महागडा ठरला.
दरम्यान, १७ नोव्हेंबर रोजी रिटेन केलेल्या खेळाडूंची यादी जाहीर करणे अनिवार्य असून १६ डिसेंबर रोजी गोव्यात आयपीएलचे मिनी ऑक्शन होणार आहे.
गुजरातमध्ये घरवापसी
हर्षल पटेलसाठी गुजरात टायटन्सकडून खेळण्याची ही संधी विशेष ठरणार आहे. अहमदाबादमध्ये जन्मलेला हर्षल काही वर्षांपूर्वी देशांतर्गत क्रिकेट खेळण्यासाठी गुजरातमध्ये स्थायिक झाला होता. या महिन्याच्या अखेरीस तो वयाची ३६ वर्षे पूर्ण करणार आहे. गुजरातच्या संघात त्याच्याकडून अनुभवाची भर पडण्याची अपेक्षा आहे. कागिसो रबाडा, मोहम्मद सिराज, प्रसिद्ध कृष्णा आणि जेसन होल्डर यांच्यासोबत तो वेगवान गोलंदाजीची फळी अधिक मजबूत करू शकतो.