ॲम्स्टेलवीन : बचावातील चुका महागात पडल्यामुळे पुरुषांच्या विश्वचषक हॉकी स्पर्धेत भारतीय संघाला सोमवारी ड-गटातील दुसऱ्या साखळी सामन्यात इंग्लंडकडून २-४ असा पराभव पत्करावा लागला. पहिल्या सामन्यात वेल्सचा ३-१ असा पराभव करणाऱ्या हरमनप्रीत सिंगच्या नेतृत्वाखालील भारतीय संघाला आता दुसऱ्या फेरीत पोहोचण्यासाठी बुधवारी पारंपरिक प्रतिस्पर्धी पाकिस्तानला नमवावे लागेल.
पहिल्या सत्रात १४व्या मिनिटाला निकोलस बांदारुकने गोल करून इंग्लंडला १-० अशी आघाडी मिळवून दिली. यानंतर भारताने जोरदार पुनरागमन केले. १७व्या मिनिटाला कर्णधार हरमनप्रीत सिंगने पेनल्टी कॉर्नरवर गोल करून भारताला १-१ अशी बरोबरी साधून दिली. त्यानंतर २५व्या मिनिटाला दिलप्रीत सिंगने गोल करून मध्यंतरापर्यंत भारताला २-१ अशी आघाडी मिळवून दिली.
मध्यंतरानंतर तिसऱ्या सत्रात सामना पूर्णपणे इंग्लंडच्या बाजूने झुकला. ३९व्या मिनिटाला स्टुअर्ट रशमियरने आणि ४३व्या मिनिटाला हेन्री क्रॉफ्टने गोल करत इंग्लंडला ३-२ अशी आघाडी मिळवून दिली. ५५व्या मिनिटाला निकोलस बांदारुकने पेनल्टी कॉर्नरवर आपला वैयक्तिक दुसरा गोल करत इंग्लंडच्या ४-२ अशा विजयावर शिक्कामोर्तब केले.
इंग्लंडने सलग दोन विजय मिळवून ड-गटात अव्वल स्थान पटकावले आहे, तर भारत तीन गुणांसह दुसऱ्या स्थानावर आहे. वेल्सविरुद्ध सामना बरोबरीत सोडवणारा पाकिस्तान संघ एक गुणासह तिसऱ्या स्थानावर आहे. बुधवारी होणाऱ्या अंतिम साखळी सामन्यात भारताला पाकिस्तानविरुद्ध विजय किंवा बरोबरी आवश्यक आहे. पराभूत झाल्यास भारतीय संघ स्पर्धेतून बाहेर पडेल.
महिलांसमोर आज दक्षिण आफ्रिकेचे आव्हान
ॲम्स्टेलवीन : जागतिक क्रमवारीतील चौथ्या क्रमांकाच्या अन् ऑलिम्पिक रौप्यपदक विजेत्या चीनला २-२ असे बरोबरीत रोखल्यानंतर उंचावलेल्या आत्मविश्वासाच्या जोरावर भारतीय महिला हॉकी संघ मंगळवारी दुसऱ्या सामन्यात दक्षिण आफ्रिकेचा सामना करेल.
महिला हॉकी विश्वचषकातील ड-गटात अव्वल दोन संघांमध्ये स्थान मिळवून दुसऱ्या फेरीत पोहोचण्याच्या दृष्टीने भारतासाठी हा सामना अत्यंत महत्त्वाचा मानला जात आहे. जागतिक क्रमवारीत नवव्या स्थानावर असलेल्या भारताने साखळी फेरीतील पहिल्या सामन्यात बलाढ्य चीनविरुद्ध शिस्तबद्ध खेळ करत महत्त्वपूर्ण एक गुण मिळवला होता. सध्या ड-गटात दक्षिण आफ्रिकेचा ४-० असा पराभव करणारा इंग्लंड संघ अव्वल स्थानावर असून भारत आणि चीन संयुक्तपणे दुसऱ्या स्थानावर आहेत. उपांत्य फेरीच्या शर्यतीसाठी प्रत्येक पूलमधून अव्वल दोन संघ दुसऱ्या फेरीत (इ आणि एफ गट) प्रवेश करतील.
पहिल्या फेरीतील एकमेकांविरुद्धचे गुण दुसऱ्या फेरीतही ग्राह्य धरले जाणार असल्याने चीनविरुद्ध मिळालेला एक गुण भारतासाठी फायदेशीर ठरणार आहे. १८व्या क्रमांकावर असलेल्या दक्षिण आफ्रिकेविरुद्ध विजय मिळवून गुणतालिकेतील स्थान मजबूत करण्याचा भारतीय संघाचा प्रयत्न असेल. त्यामुळे भारतावर लक्ष असेल.
वेळ : सायंकाळी ६.३० वाजता
थेट प्रक्षेपण : स्टार स्पोर्ट्स सिलेक्ट २, जिओहॉटस्टार ॲप
