बिलासपूर : यंदाच्या रणजी करंडक हंगामाची विजयी सुरुवात करणारा मुंबईचा संघ रविवारी हिमाचल प्रदेशविरुद्ध मैदानात उतरेल. चंदीगडविरुद्ध तीन दिवसांत बोनस गुणांसह विजय मिळवल्यानंतर मुंबईचे सलग दुसऱ्या विजयाचे लक्ष्य असेल. मात्र, प्रमुख खेळाडूंच्या अनुपस्थितीत मुंबईला हिमाचल प्रदेशच्या मैदानावर खेळावे लागणार आहे.
हिमाचल प्रदेशला मागील सामन्यात हरयाणाकडून पराभव स्वीकारावा लागला होता. आता घरच्या मैदानावर दमदार कामगिरी करण्याचे त्यांच्यासमोर आव्हान असेल. विशेष म्हणजे, निसर्गरम्य लुहणू क्रिकेट मैदानावर हिमाचल प्रदेशने तब्बल २५ वर्षांपासून प्रथम श्रेणीचा सामना खेळलेला नाही. त्यामुळे घरच्या मैदानाचा फायदा कितपत मिळतो, हे पाहणे महत्त्वाचे ठरेल. तुलनेने अनुभव कमी असलेल्या हिमाचलच्या गोलंदाजांसमोर मुंबईच्या फलंदाजांना रोखण्याचे कठीण आव्हान असेल.
मुंबईला आयुष म्हात्रे आणि यशस्वी जैस्वाल यांच्या अनुपस्थितीचा सामना करावा लागणार आहे. उजव्या मांडीच्या स्नायूला दुखापत झाल्यामुळे आयुष चार ते सहा आठवडे मैदानाबाहेर राहणार आहे. तर, दोन कसोटी सामन्यांच्या मालिकेच्या तयारीसाठी यशस्वी जैस्वाल भारत 'अ' संघासोबत न्यूझीलंड दौऱ्यावर रवाना होणार आहे.
उपकर्णधार आयुष म्हात्रे आणि सलामीवीर यशस्वी जैस्वाल यांच्या जागी अंगरिश रघुवंशी आणि सूर्याश शेडगे यांचा मुंबईच्या संघात समावेश करण्यात आला आहे. २३ वर्षांखालील कर्नल सी. के. नायडू करंडक स्पर्धेत सलग दोन द्विशतके झळकावणारा रघुवंशी मुंबईच्या डावाची सुरुवात दिव्यांश सक्सेनासोबत करण्याची शक्यता आहे. शेडगेच्या समावेशामुळे मधल्या फळीतील पर्याय वाढले आहेत. सर्फराज खान, मुशीर खान आणि कर्णधार सिद्धेश लाड यांच्यावरही फलंदाजीची महत्त्वाची जबाबदारी असेल.
मुंबईच्या गोलंदाजीची धुरा तुषार देशपांडे सांभाळेल. चंदीगडविरुद्धच्या पहिल्या डावात हॅटट्रिकसह त्याने एकूण सात बळी घेतले होते. शार्दुल ठाकूर अद्याप पूर्णपणे तंदुरुस्त नसल्याने मोहित अवस्थी आणि सिल्वेस्टर डिसूझा वेगवान गोलंदाजीची जबाबदारी सांभाळतील. अनुभवी फिरकीपटू तनुष कोटियन आणि शम्स मुलानी यांच्यामुळे मुंबईच्या गोलंदाजीला अधिक बळ मिळेल.
आयुष, यशस्वीची अनुपस्थिती
मुंबईला आयुष म्हात्रे आणि यशस्वी जैस्वाल यांच्या अनुपस्थितीचा सामना करावा लागणार आहे. उजव्या मांडीच्या स्नायूला दुखापत झाल्यामुळे आयुष चार ते सहा आठवडे मैदानाबाहेर राहणार आहे. तर, दोन कसोटी सामन्यांच्या मालिकेच्या तयारीसाठी यशस्वी जैस्वाल भारत 'अ' संघासोबत न्यूझीलंड दौऱ्यावर रवाना होणार आहे. दीर्घकाळ दुखापतीमुळे क्रिकेटपासून दूर राहिल्यानंतर आयुष म्हात्रेने रणजी करंडक स्पर्धेच्या पहिल्या फेरीतून स्पर्धात्मक क्रिकेटमध्ये पुनरागमन केले होते. मात्र, त्याचे पुनरागमन केवळ एका डावापुरतेच मर्यादित राहिले. पहिल्याच फेरीत उजव्या मांडीच्या स्नायूला ग्रेड-४ची गंभीर दुखापत झाल्याने त्याला पुन्हा मैदानाबाहेर जावे लागले.
