मुंबई : फलंदाजीत शतक साकारल्यानंतर मुशीर खानने गोलंदाजीतही चमक दाखवताना ८५ धावांत ६ बळी मिळवले. त्यामुळे मुंबईने रणजी करंडक क्रिकेट स्पर्धेत ड-गटात हरयाणाविरुद्ध पहिल्या डावात १६० धावांची आघाडी घेतली.
बीकेसी येथील शरद पवार अकादमीच्या मैदानात सुरू असलेल्या या लढतीत मुंबईने हरयाणावर फॉलोऑन लादला. तिसऱ्या दिवसअखेर हरयाणाची दुसऱ्या डावात २१ षटकांत २ बाद ७३ अशी स्थिती असून ते अद्याप ८७ धावांनी पिछाडीवर आहेत. त्यामुळे मुंबई गुरुवारी चौथ्या दिवशी त्यांना लवकर गुंडाळून सलग तिसरा बोनस गुणासह विजय मिळवणार की हरयाणा किमान लढत अनिर्णित राखणार, हे पाहणे रंजक ठरेल. सिद्धेश लाडच्या नेतृत्वात खेळणाऱ्या मुंबईने पहिल्या दोन लढतीत अनुक्रमे चंदीगड व हिमाचल प्रदेशचा धुव्वा उडवून १४ गुण कमावले आहेत.
देशांतर्गत क्रिकेटमध्ये प्रतिष्ठेचे स्थान असलेल्या रणजी स्पर्धेच्या ९२व्या हंगामाला ११ ऑक्टोबरपासून प्रारंभ झाला. एलिट गटातील ३२ संघांत होणाऱ्या या स्पर्धेत कोण बाजी मारणार, हे पाहणे रंजक ठरेल. गतवर्षीप्रमाणे यावेळीसुद्धा रणजी स्पर्धा दोन टप्प्यांत खेळवण्यात येईल. या स्पर्धेचा पहिला टप्पा ११ ऑक्टोबर ते ५ नोव्हेंबर या कालावधीत होईल. या काळात प्रत्येक संघ चार सामने खेळेल. दरम्यानच्या काळात विजय हजारे एकदिवसीय स्पर्धा व सय्यद मुश्ताक अली टी-२० स्पर्धा रंगेल. १७ जानेवारीपासून रणजीचा दुसरा टप्पा सुरू होईल.
तत्पूर्वी, मुंबईने पहिल्या डावात ४३० धावा केल्या होत्या. त्याला उत्तर देताना हरयाणाचा डाव २७० धावांत आटोपला. मुशीरने ८५ धावांत सहा विकेट्स घेत हरयाणाच्या पहिल्या पाच फलंदाजांना बाद करण्यात महत्त्वाची भूमिका बजावली. हरयाणाकडून निशांत सिंधूने नाबाद १०५ धावांची झुंजार खेळी करत एकाकी लढत दिली.
मुंबईच्या वांद्रे-कुर्ला संकुलातील मैदानावर सुरू असलेल्या या सामन्याच्या तिसऱ्या दिवसअखेर हरियाणाने दुसऱ्या डावात दोन विकेट्स गमावून ७३ धावा केल्या होत्या. त्यामुळे संघ अजूनही ८७ धावांनी पिछाडीवर असून, अखेरच्या दिवशी त्यांच्यासमोर मुंबईची आघाडी मिटवण्याचे आव्हान असेल. खेळपट्टीचा वेग मंदावला असून ती अधिक खराब होत असल्याने फलंदाजांसाठी पुढील खेळ सोपा नसेल.
मुशीरने सांगितले की, खेळपट्टीचा वेग खूपच कमी झाला आहे. चेंडू अधिक उसळी घेत असलेल्या भागांवर गोलंदाजी करण्याचा प्रयत्न फिरकीपटू करत आहेत. अशा परिस्थितीत चेंडूला वळणही मिळत असल्याचे त्याने नमूद केले.
दुसऱ्या डावात हरयाणाला सुरुवातीलाच धक्के बसले. कर्णधार अंकित कुमार याला तनुष कोटियनने बाद केले. त्यानंतर सलामीवीर हिमांशू राणा याच्या हेल्मेटला सिल्वेस्टर डिसोझाच्या गोलंदाजीवर चेंडू लागल्याने त्याला दुखापत झाली आणि त्याने मैदान सोडले.
मुशीर हा एकाच रणजी सामन्यात शतक साकारण्यासह पाच बळी घेणारा मुंबईचा सहावा खेळाडू ठरला. तसेच २१व्या शतकात अशी कामगिरी करणारा तो मुंबईचा पहिलाच खेळाडू आहे. यापूर्वी रवी शास्त्रीने १९९१मध्ये अशी कामगिरी केली होती.
