नवी दिल्ली : जपानमध्ये होणाऱ्या आशियाई क्रीडा स्पर्धेपूर्वी भारताला नीरज चोप्राच्या माध्यमातून मोठा धक्का बसला आहे. टोकियो ऑलिम्पिक सुवर्णपदक विजेता भालाफेकपटू नीरज चोप्राने घोट्याच्या दुखापतीमुळे डायमंड लीगसह आशियाई स्पर्धेतून माघार घेतली आहे. त्यामुळे यंदाच्या उर्वरित मोसमात तो एकाही स्पर्धेत खेळू शकणार नाही.
लुसाने डायमंड लीगमध्ये हंगामातील सर्वोत्तम कामगिरीची नोंद केल्यानंतर काही काळातच सरावादरम्यान आपल्या घोट्याला लिगामेंटची दुखापत झाल्याचे चोप्राने सांगितले. डॉक्टर आणि आपल्या टीमशी चर्चा केल्यानंतर संपूर्ण हंगामातून माघार घेण्याचा निर्णय घेतल्याचे त्याने स्पष्ट केले. शनिवारी नीरज चोप्राने सोशल मीडियावरून ही माहिती दिली.
"दीर्घकाळाच्या मेहनतीनंतर लुसाने येथे हंगामातील सर्वोत्तम भालाफेकीसह मला अपेक्षित असलेली लय गवसल्याचे जाणवत होते. मात्र, दुर्दैवाने त्यानंतर लगेचच सरावादरम्यान माझ्या घोट्याच्या लिगामेंटला दुखापत झाली. डॉक्टर आणि वैद्यकीय पथकाशी चर्चा केल्यानंतर उर्वरित हंगामातून माघार घेण्याचा निर्णय घेतला आहे," असे चोप्राने म्हटले. आता दुखापतीतून पूर्णपणे सावरणे आणि त्यानंतर आणखीन मजबूत पुनरागमन करणे हे आपले प्राधान्य असल्याचे त्याने स्पष्ट केले.
"अडथळे हा प्रवासाचा एक भाग असतात. आता माझे लक्ष योग्य पद्धतीने बरे होण्यावर आणि आणखी मजबूत पुनरागमन करण्यावर आहे," असे चोप्राने म्हटले.
या दुखापतीमुळे ५ सप्टेंबर रोजी ब्रुसेल्स येथे होणाऱ्या डायमंड लीग फायनल्स स्पर्धेतही नीरज खेळू शकणार नाही. या स्पर्धेसाठी त्याने पात्रता मिळवली होती. आशियाई क्रीडा स्पर्धेत भारतासाठी सुवर्णपदकाचा प्रमुख दावेदार मानल्या जाणाऱ्या नीरजच्या माघारीमुळे भारतीय पथकाच्या पदकांच्या आशांना फटका बसला आहे. टोकियो ऑलिम्पिक २०२१ मध्ये सुवर्ण आणि पॅरिस ऑलिम्पिक २०२४ मध्ये रौप्यपदक पटकावणाऱ्या नीरजने २०२३ मध्ये बुडापेस्ट येथे
जागतिक अॅथलेटिक्स अजिंक्यपद स्पर्धेत सुवर्णपदक जिंकून इतिहास रचला होता. ही कामगिरी करणारा तो पहिला भारतीय खेळाडू ठरला होता.
२०२६मधील नीरज चोप्राची कामगिरी
नीरज चोप्राने जूनमध्ये दोहा डायमंड लीगमधून स्पर्धात्मक पुनरागमन केले. त्याने ८५.६९ मीटर भालाफेक करत चौथे स्थान मिळवले. त्यानंतर ग्लासगो येथे झालेल्या राष्ट्रकुल क्रीडा स्पर्धेत त्याच्या कामगिरीत सुधारणा झाली. ८५.८३ मीटर भालाफेक करत त्याने रौप्यपदक पटकावले. श्रीलंकेच्या रुमेश पाथिरागेने ८९.७५ मीटर भालाफेक करत सुवर्णपदक जिंकले. लुसाने डायमंड लीगमध्येही चोप्राने आपला चांगला फॉर्म कायम ठेवला. येथेही तो पाथिरागेच्या मागे राहून उपविजेता ठरला. चोप्राने ८८.०५ मीटर ही हंगामातील सर्वोत्तम भालाफेक नोंदवली. मात्र, पाथिरागेच्या ८८.१९ मीटरच्या विजयी प्रयत्नापेक्षा तो अवघ्या १४ सेंटीमीटरने मागे राहिला. संपूर्ण हंगामात चोप्राने केवळ दोन डायमंड लीग स्पर्धांमध्ये सहभाग घेतला असला तरी त्याने एकूण १२ गुण मिळवत ५ सप्टेंबर रोजी होणाऱ्या ब्रुसेल्स डायमंड लीग फायनलसाठी पात्रता मिळवली होती.
