बार्बाडोस : वेस्ट इंडिजमधील बार्बाडोस येथे झालेल्या टी-20 विश्वचषक स्पर्धेच्या अंतिम फेरीतील शानदार विजयानंतर टीम इंडियाच्या विजयाची केवळ देशातच नाही तर परदेशातही चर्चा होत आहे. विराट आणि अक्सर पटेलच्या शानदार खेळीने भारताच्या विजयात महत्त्वाची भूमिका बजावली, तर स्लॉग ओव्हर्समध्ये बुमराह, अर्शदीप आणि हार्दिक पांड्याची गोलंदाजी आणि सूर्यकुमार यादवच्या झेलनेही महत्त्वाची भूमिका बजावली भारतीय संघाच्या विजयाची पाकिस्तानमध्येही जोरदार चर्चा आहे.
पाकिस्तानमधील सर्व वृत्तपत्रे, वृत्तवाहिन्या आणि पाकिस्तानच्या माजी क्रिकेटपटूंनी भारतीय संघाचे कौतुक केले आहे. पाकिस्तानच्या प्रमुख वृत्तपत्रांच्या पहिल्या पानाच्या बातम्यांमध्ये टीम इंडियाच्या विजयाच्या बातमीला स्थान देण्यात आले आहे. माजी क्रिकेटपटूंनीही रोहित शर्माच्या कर्णधारपदाचे आणि जसप्रीत बुमराहच्या गोलंदाजीचे कौतुक केले आहे. चला तर मग जाणून घेऊया टीम इंडियाच्या विजयावर माजी क्रिकेटपटू काय म्हणाले-
शोएब अख्तरने केली होती विजयाची भविष्यवाणी:
पाकिस्तानचा माजी वेगवान गोलंदाज शोएब अख्तरने सामन्यापूर्वीच टीम इंडियाच्या विजयाची भविष्यवाणी केली होती. अख्तर यूट्यूब चॅनलवर म्हणाला, "मी वारंवार सांगत होतो की, भारत केवळ ही स्पर्धाच नव्हे तर ५० षटकांचा विश्वचषक जिंकण्यासही पात्र आहे. अहमदाबादमध्ये रोहितने जी चूक केली, ती आज सुधारली आहे."
अख्तर म्हणाला, 'हार्दिक पांड्या आणि बुमराहची जेवढी स्तुती करावी तेवढी कमीच आहे. हा सामना नक्कीच गोलंदाजांसाठी होता, पण कोहलीने किती शानदार खेळी खेळली. जेव्हा क्लासेन आणि डी कॉक आणि स्टब्स खेळत होते, तेव्हा असे वाटत होते की सामना संपला आहे. पण त्याच वेळी रोहितने दडपणाखाली कर्णधार कसा करावा हे दाखवून दिले.
विराट आणि रोहितच्या निवृत्तीचा संदर्भ देत अख्तर म्हणाला, "विराट कोहली हा जगातील १ फलंदाज आहे, तुम्हाला रोहित शर्मालाही जगातील नंबर १ कर्णधार मानावे लागेल. दोघांनीही आपल्या टी-20 कारकिर्दीचा चांगला शेवट केला. विराट कोहलीचा निवृत्तीचा निर्णय हा खूप चांगला निर्णय आहे, असे मला वाटते."
अकमल आणि सोहेलकडून रोहितचं कौतुक-
पाकिस्तानी वृत्तवाहिन्यांवर तज्ञ म्हणून दिसणाऱ्या माजी क्रिकेटपटूंनीही भारतीय खेळाडूंचे कौतुक केले. माजी क्रिकेटपटू कामरान अकमल एआरवाय न्यूज चॅनलशी बोलताना म्हणाला, "हार्दिक पांड्याने दाखवून दिले आहे की तो जगातील नंबर वन अष्टपैलू खेळाडू आहे. त्याने क्लासेनला बाद करताच बुमराह आणि अर्शदीपनेही शानदार गोलंदाजी केली. सामना शेवटपर्यंत नेऊन मिलरने चूक केली."
सूर्यकुमार यादवच्या झेलचे कौतुक करताना आणखी एका तज्ज्ञाने सांगितले की, "या स्पर्धेत भारताकडे सर्वोत्तम क्षेत्ररक्षण आणि सर्वोत्तम कॅप्टनसी होती."
माजी पाकिस्तानी क्रिकेटर आमिर सोहेल म्हणाला, "टीम इंडियाने अप्रतिम खेळ केला. क्लासेन खेळत असताना भारतीय संघाच्या देहबोलीवरून असे वाटत होते की, त्यांनीही पराभव स्वीकारला आहे. पण जिथून बुमराहने गोलंदाजी करत संघात नवसंजीवनी दिली. पहिल्या दोन धावा दिल्या आणि एक विकेटही घेतली."
रमीझ राजाने रोहितच्या कर्णधारपदाचे केले कौतुक-
त्याचवेळी पाकिस्तानचा माजी कर्णधार रमीझ राजानेही भारतीय संघाचे कौतुक करताना म्हटले की, 'अशा प्रकारचा सामना खूप दिवसांनी पाहिला आहे. त्यांनी परिस्थितीचा चांगला वापर केला. भारताने अशक्यप्राय विजय मिळवला. खेळाडू घडवण्यात अनेकांचा हातखंडा आहे, यामध्ये प्रशिक्षक राहुल द्रविडचाही महत्त्वाचा वाटा आहे. त्याने गोलंदाजी केलेल्या अचूक स्पेलमुळे धावगती वाढल्याने आफ्रिकेवर दबाव आला. रोहितच्या कर्णधारपदाचे कौतुक करावे लागेल, त्याने अर्शदीप आणि बुमराहचा योग्य वापर केला."
पाकिस्तानी गोलंदाजांचे नाव न घेता रमीझ राजा यांनी टोमणे मारत म्हटले, 'चांगली गोष्ट म्हणजे भारतीय गोलंदाज कोणाचाही हेवा करत नाहीत. ते एकमेकांच्या कामगिरीचा आनंद घेतात.
भारताच्या विजयावर पाकिस्तानची वर्तमानपत्रे काय म्हणतात?
'द डॉन'ने 'कोहलीच्या शानदार खेळीमुळे दक्षिण आफ्रिकेला हरवून भारताने विजेतेपद पटकावले' अशा मथळ्यासह टीम इंडियाच्या विजयाचा आनंद साजरा करणारा फोटो शेअर केला आहे. कर्णधार रोहित शर्माचे कौतुक करताना या वृत्तपत्राने लिहिले की, 'रोहितने शेवटच्या षटकापर्यंत वेगवान गोलंदाज जसप्रीत बुमराहची वाट पाहिली नाही आणि आधीच त्याला गोलंदाजीसाठी बोलावले. त्याने १८व्या षटकात मार्को जेन्सनला गोलंदाजी करून केवळ दोन धावा देत कर्णधाराचा निर्णय योग्य असल्याचे सिद्ध केले. कोहलीच्या निवृत्तीच्या बातमीलाही वृत्तपत्राने महत्त्वाचं स्थान दिलं आहे.
'द एक्सप्रेस ट्रिब्यून'ने लिहिले की, 'कोहलीच्या ७६ धावांमुळे भारताने शेवटच्या षटकापर्यंत रंगलेल्या शानदार सामन्यात दक्षिण आफ्रिकेचा पराभव केला.' वृत्तपत्राने लिहिले की संघाच्या चाहत्यांनी हा शानदार विजय साजरा केला आणि शेकडो लोक इंडिया गेटवर जमले आणि भारताच्या समर्थनार्थ घोषणाबाजी केली. सामना सुरू होण्यापूर्वी भारतीय संघाच्या चाहत्यांनी मंदिरांमध्ये विजयासाठी प्रार्थनाही केली. याशिवाय रोहित आणि विराटच्या निवृत्तीच्या बातम्यांनाही वृत्तपत्राने महत्त्वाचं स्थान दिलं.
'द पाकिस्तान टुडे'ने 'भारत १७ वर्षांनंतर दुसऱ्यांदा T20 वर्ल्ड चॅम्पियन बनला' अशी मथळा प्रसिद्ध केली आहे. वृत्तपत्राने विराट कोहलीच्या ७६ धावांचे कौतुक करतानाच भारतीय गोलंदाजांच्या कामगिरीचेही कौतुक केले आहे. वृत्तपत्राने लिहिले की, विराट कोहली संपूर्ण स्पर्धेत संघर्ष करताना दिसला, पण त्याने योग्य वेळी त्याची सर्वोत्तम खेळी खेळली. अर्शदीप सिंगच्या १९व्या षटकाचे कौतुक करताना वृत्तपत्राने लिहिले की, जेव्हा दक्षिण आफ्रिकेला २ षटकात २० धावांची गरज होती तेव्हा अर्शदीपने केवळ ४ धावा दिल्या.
