मेलबर्न : ऑस्ट्रेलियाचा वेगवान गोलंदाज तसेच कर्णधार पॅट कमिन्स पाठदुखीमुळे प्रतिष्ठित ॲशेस मालिकेतील पहिल्या कसोटीला मुकणार आहे. त्याच्या जागी अनुभवी फलंदाज स्टीव्ह स्मिथ ऑस्ट्रेलियाचे नेतृत्व करणार आहे.
ऑस्ट्रेलिया-इंग्लंड यांच्यातील पाच सामन्यांच्या कसोटी मालिकेला २१ नोव्हेंबरपासून प्रारंभ होणार आहे. बेन स्टोक्सच्या नेतृत्वात खेळणाऱ्या इंग्लंडने या मालिकेसाठी मागेच संघ जाहीर केला. पर्थ येथे पहिली कसोटी रंगणार असून त्यानंतर ४ डिसेंबरपासून ब्रिस्बेन येथे दुसरी, १७ डिसेंबरपासून ॲडलेडला तिसरी, २६ डिसेंबरपासून मेलबर्नला चौथी, तर ४ जानेवारीपासून सिडनीला पाचवी कसोटी खेळवण्यात येईल.
कमिन्स पाठीच्या दुखापतीमुळे जुलै महिन्यापासून क्रिकेटपासून दूर आहे. कमिन्सच्या अनुपस्थितीत जोश हेझलवूड, मिचेल स्टार्कवर गोलंदाजीची मदार असेल.
