सेंट लुईस : भारताचा ग्रँडमास्टर आर. प्रज्ञानंदने जर्मनीच्या विन्सेंट कीमरचा पराभव करत ग्रँड चेस टूरच्या अंतिम स्पर्धेत ९-३ अशी भक्कम आघाडी घेतली आहे. या विजयासह प्रज्ञानंदने अंतिम फेरीत प्रवेश करण्याची आपली दावेदारी भक्कम केली आहे.
पांढऱ्या मोहऱ्यांनी खेळताना सुरवातीला प्रज्ञानंद अडचणीत सापडला होता आणि कीमरने त्याच्या राजावर आक्रमक चाल रचली होती. मात्र, कीमरच्या एका रणनीतिक चुकीमुळे सामना फिरला. त्याने घोड्याच्या बदल्यात हत्ती मिळवला, परंतु यामुळे प्रज्ञानंदला आगेकूच करणारा प्यादा मिळाला आणि कीमरचा हत्ती अडचणीत सापडला. दोन्ही खेळाडू वेळेच्या दबावाखाली खेळत असताना कीमरने ५५व्या चालीला हार स्वीकारली. या विजयामुळे प्रज्ञानंद आता ४ लाख ५० हजार अमेरिकन डॉलर बक्षीस रक्कम असलेल्या या स्पर्धेच्या अंतिम फेरीत पोहोचण्यापासून अवघे सहा गुण दूर आहे. सिंकफिल्ड चषक बुद्धिबळ स्पर्धेत प्रज्ञानंदला उपविजेतेपद मिळाले होते.
या स्पर्धेत विजेत्याला २ लाख अमेरिकन डॉलरचे बक्षीस मिळणार आहे. या उपांत्य फेरीत एकूण २८ गुण पणाला लागले असून १५ गुण मिळवणारा खेळाडू अंतिम फेरीत प्रवेश करेल. पहिल्या तीन क्रमांकावरील खेळाडूंना पुढील वर्षीच्या ग्रँड चेस टूरसाठी थेट प्रवेश मिळणार आहे. दुसऱ्या उपांत्य फेरीत अमेरिकेच्या फॅबियानो कारुआनाला विजय मिळवता आला नाही.
