मुंबई : राज्यस्तरीय कामगार कबड्डी स्पर्धेत दुसऱ्या दिवसाच्या साखळी सामन्यांत पुरुष शहर विभागात न्यू इंडिया इन्शुरन्स, भारत पेट्रोलियम, अमर हिंद या संघांनी दमदार विजय नोंदवले.
न्यू इंडिया संघाने रिझर्व्ह बँकेवर २१-१९ अशी मात केली. कौस्तुभ शिंदेच्या चढाया व ओमकार येनपुरेच्या पकडींच्या बळावर त्यांनी विजय मिळवला. रिझर्व्ह बँकेकडून तुषार शिंदे व रुबेल तेलगरेने चांगला खेळ केला. भारत पेट्रोलियमने माझगाव डॉकला २०-१८ असे दोन गुणांच्या फरकाने नमवले. रोहन पाटील, आदिनाथ गायकवाड यांच्या चढाया व सुनील मल्लईच्या बचावाला याचे श्रेय जाते.
महिलांच्या विभागात ठाण्याच्या ओम वर्तकनगर संघाने स्नेहविकास क्रीडा मंडळाला २५-१३ अशी धूळ चारली. पूजा जाधव, पूर्वा इंगावले यांनी चमक दाखवली. तसेच होतकरू संघाने ओम ज्ञानदीप संघाचा ४५-१४ असा धुव्वा उडवला.
