मुंबई : तनुष कोटियनच्या फिरकी गोलंदाजीपुढे रेल्वेचा पहिला डाव २५९ धावांत आटोपला. त्यानंतर अंगक्रिश रघुवंशी आणि दिव्यांश सक्सेना यांनी झळकावलेल्या अर्धशतकांच्या जोरावर मुंबईने रणजी करंडक एलिट गट ड सामन्यात आपली पकड मजबूत केली. तिसऱ्या दिवसाचा खेळ संपला तेव्हा मुंबईने एकूण ३११ धावांची आघाडी घेतली होती.
कोटियनने ४५ धावांत सात बळी मिळवत मुंबईच्या पहिल्या डावातील आघाडीचा पाया रचला. त्याने सलग दुसऱ्या सामन्यात पाच किंवा त्यापेक्षा अधिक बळी घेण्याची कामगिरी केली. याआधी हरियाणाविरुद्धच्या सामन्यात त्याने ८१ धावांत आठ बळी मिळवले होते. त्याच्या या कामगिरीमुळे मुंबईला रेल्वेविरुद्ध पहिल्या डावात १३७ धावांची महत्त्वपूर्ण आघाडी मिळाली.
दुसऱ्या डावात मुंबईच्या सलामीवीरांनी दमदार सुरुवात केली. रघुवंशी आणि सक्सेना यांनी पहिल्या विकेटसाठी १४६ धावांची भागीदारी केली. मात्र, त्यानंतर मुंबईने झटपट चार विकेट गमावल्या. दिवसअखेर मुंबईची धावसंख्या ४ बाद १७४ अशी होती.
रघुवंशीने ८५ चेंडूंत १० चौकार आणि एका षटकारासह ७९ धावा केल्या. त्याला सक्सेनाने उत्तम साथ दिली. सक्सेना ११४ चेंडूंत सहा चौकारांसह ६८ धावांवर नाबाद होता. रघुवंशी बाद झाल्यानंतर सूर्यांश शेडगे (२), मुशीर खान (९) आणि तुषार देशपांडे (०) हे फलंदाज झटपट माघारी परतले. त्यामुळे मुंबईची धावसंख्या ४ बाद १७४ अशी झाली. दिवसाचा खेळ थांबला तेव्हा सक्सेनासोबत सरफराज खान तीन धावांवर खेळत होता. मुंबईला दुसऱ्या डावात आणखी ४० ते ५० धावा जोडायच्या असून एकूण आघाडी ३५० धावांच्या पुढे नेण्याचा संघाचा प्रयत्न असेल, असे कोटियनने सांगितले.
ब्रेबॉर्न स्टेडियमवरील खेळपट्टी पहिल्या दोन दिवसांत फलंदाज आणि गोलंदाज या दोघांसाठी जवळपास अनुकूल होती. मात्र, तिसऱ्या दिवशी कोटियनने आपल्या अचूक फिरकीच्या जोरावर सामन्याचे चित्र बदलले.
रेल्वेने दिवसाची सुरुवात २ बाद ११६ धावांपासून केली होती. रवि सिंगने ४३ धावांची खेळी करत मुंबईच्या गोलंदाजांना काही काळ संघर्ष करायला लावला. त्याने चार चौकार आणि दोन षटकार ठोकले. मात्र, कोटियनच्या नेतृत्वाखाली मुंबईच्या गोलंदाजांनी उर्वरित आठ फलंदाजांना आणखी १४३ धावांत बाद केले.
कोटियनने १८.५ षटके गोलंदाजी करताना आठ निर्धाव षटकांसह ४५ धावा देत सात बळी मिळवले. त्याने तिसऱ्या दिवशी सकाळच्या सत्रातच सहा बळी घेत रेल्वेचा डाव गुंडाळण्यात मोलाची भूमिका बजावली.
दरम्यान, दुसरीकडे विदर्भाने अ-गटात मध्य प्रदेशला १ डाव आणि २० धावांच्या फरकाने धूळ चारली. २०९ धावांच्या प्रत्युत्तरात विदर्भाने पहिल्या डावात ३३४ धावा केल्या. मात्र मध्य प्रदेशचा दुसरा डाव १०५ धावांतच आटोपला. पहिल्या डावात ९ बळी घेणाऱ्या हर्ष दुबेने ५ गडी बाद केले.
भारतीय संघातील निवडीबाबत आशावादी
भारतीय वरिष्ठ संघात स्थान मिळवण्याच्या शक्यतेबाबत विचारले असता कोटियन म्हणाला, “मला वाटते की मी त्या संधीच्या जवळ आहे. मात्र, अंतिम निर्णय निवड समितीचा असेल. माझ्या हातात असलेल्या गोष्टी योग्य पद्धतीने करणे हेच माझे काम आहे.”
खेळपट्टीबाबत कोटियन म्हणाला, “मागील आठवड्यातील बीकेसी मैदानाच्या तुलनेत या खेळपट्टीवर चेंडू फारसा वळत नव्हता. मात्र, सरळ जाणाऱ्या चेंडूचा प्रभाव चांगला होता. त्यामुळे अचूक टप्प्यावर गोलंदाजी करणे आणि फलंदाजांवर दबाव निर्माण करणारे चेंडू टाकणे महत्त्वाचे होते.”