न्यूयॉर्क: अमेरिकेचा टेनिसपटू बेन शेल्टन याने आपल्याच देशाच्या फ्रान्सिस टियाफो याचा पराभव करत यूएस ओपन ग्रँडस्लॅम टेनिस स्पर्धेच्या अंतिम फेरीत धडक मारली आहे. उपांत्य फेरीत आठव्या मानांकित शेल्टनने टियाफोचा ४-६, ६-३, ६-३, ७-५ असा पराभव केला. आता रविवारी अंतिम फेरीत त्याचा सामना अव्वल मानांकित अलेक्झांडर झ्वेरेव्ह याच्याशी होणार असून, २००३ मधील मधील अँडी रॉडिकनंतर अमेरिकेला पहिला पुरुष ग्रँडस्लॅम विजेता मिळवून देण्याची संधी शेल्टनकडे आहे.
उपांत्यपूर्व फेरीत गतविजेत्या कार्लोस अल्कराज याला पराभूत करणाऱ्या २३ वर्षीय शेल्टनने या सामन्यात उत्तम खेळ केला. पहिल्या सेटमध्ये टियाफोने चांगली सुरुवात करत ६-४ असा विजय मिळवला होता. मात्र, त्यानंतर शेल्टनने आपल्या जोरदार सर्व्हिसच्या जोरावर पुनरागमन केले. या सामन्यात शेल्टनने २० बिनतोड सर्व्हिस टाकल्या. तिसऱ्या सेटमधील शेवटचा गेम १५ मिनिटे आणि २० गुणांपर्यंत चालला, ज्यामध्ये टियाफोचा फोरहँड नेटकडे गेला आणि शेल्टनने आघाडी घेतली. टियाफोचा यूएस ओपनच्या उपांत्य फेरीतील हा सलग तिसरा पराभव ठरला.
दुसऱ्या उपांत्य फेरीत जर्मनीच्या अलेक्झांडर इवेरेव्ह याने कॅरेन खाचानोव्ह याचा ६-३, ७-६ (७), ७-६ (६) असा पराभव करत अंतिम फेरीत प्रवेश केला. यावर्षी फ्रेंच ओपन जिंकणाऱ्या झ्वेरेव्हने या हंगामात ग्रँडस्लॅम सामन्यांमध्ये २४-२ अशी कामगिरी केली आहे. या सामन्याला सेरेना विल्यम्स, जालेन बॅन्सन, ट्रिनिटी रॉडमन, सलमा हायेक, बेन स्टिलर आणि रमी मालेक यांसारख्या क्रीडा व अभिनय क्षेत्रातील दिग्गजांची उपस्थिती होती.
