थिरुवनंतपुरम : भारताचा सुपरस्टार फलंदाज विराट कोहली याने पुढील वर्षी होणारा एकदिवसीय विश्वचषक हा आपल्या कारकीर्दीतील शेवटचा असेल, अशी घोषणा केली आहे. कसोटी आणि टी-२० आंतरराष्ट्रीय क्रिकेटमधून आधीच निवृत्त झालेला कोहली फक्त वनडे क्रिकेटमध्येच भारताचे प्रतिनिधित्व करत आहे. त्याचबरोबर आयपीएलमध्ये तो खेळताना दिसतो.
वेस्ट इंडिजविरुद्ध रविवारी सुरू होणाऱ्या एकदिवसीय मालिकेपूर्वी त्याने निवृत्तीचे संकेत दिले. आगामी विश्वचषक स्पर्धा संयुक्तपणे दक्षिण आफ्रिका, झिम्बाब्वे आणि नामिबिया या देशांमध्ये होणार आहे. 'भारतासाठी मी खेळणारा हा शेवटचा वर्ल्डकप असेल. मैदानात संपूर्ण ताकद पणाला लावून देशाला विश्वचषक जिंकून देणे हेच माझे अंतिम ध्येय असेल,' असे कोहलीने सांगितले. यापूर्वी २०११ मध्ये महेंद्रसिंग धोनीच्या नेतृत्वाखाली एकदिवसीय विश्वचषक जिंकणाऱ्या भारतीय संघात कोहलीचा समावेश होता.
