टीपटूर (कर्नाटक) : खो-खो फेडरेशन ऑफ इंडियाच्या मान्यतेने कर्नाटक खो-खो असोसिएशन आयोजित ३३वी राष्ट्रीय अजिंक्यपद किशोर-किशोरी खो-खो स्पर्धा कल्पतरू क्रीडांगण, टीपटूर, कर्नाटक येथे सुरू झाली आहे. या स्पर्धेच्या दुसऱ्या दिवशी महाराष्ट्राच्या दोन्ही संघांनी गटातील अग्रस्थानासह बाद फेरीत आगेकूच केली.
दुसऱ्या दिवशी मेघालय व नागालँड या राज्यांतील दोन्ही संघांचे खेळाडू सामन्यासाठी अनुपस्थित राहिल्याने महाराष्ट्राला पुढे चाल देण्यात आली. त्यापूर्वी, बुधवारी रात्री किशोर गटात महाराष्ट्राने तेलंगणाला ३६-३२ असे ४ गुण व २ मिनिटांच्या फरकाने नमवले. ओमकार सावंत (१ मिनिट संरक्षण व आक्रमणात ४ गडी), भीमसिंग वसावे (१ मि., २ गडी) यांनी सुरेख खेळ केला. किशोरी गटातील सलामीच्या लढतीत महाराष्ट्राने झारखंडचा ३४-१२ असा १ डाव व २२ गुणांच्या फरकाने धुव्वा उडवला. कर्णधार मैथिली पवार (३.२० मि., १२ गडी), समृद्धी सुरवसे (२.२० मि., ८ गडी) यांनी अष्टपैलू चमक दाखवली.
