नवी मुंबई : कोपरखैरणे सेक्टर-५ मध्ये इमारतीच्या बांधकामासाठी खोदण्यात आलेल्या खड्ड्यात पडून एका ७ वर्षीय मुलाचा मृत्यू झाल्याची घटना बुधवारी सायंकाळी घडली. अंकित पानसिंग ठनगुगा असे या दुर्घटनेत मृत झालेल्या मुलाचे नाव आहे. ज्या बांधकाम साइडवरील खड्ड्यात पडून लहानग्या अंकितचा मृत्यू झाला. त्या खड्ड्याच्या आजूबाजूला सुरक्षिततेच्या दृष्टीने कुठल्याही प्रकारची उपाययोजना केली नसल्यामुळे अंकित खेळता खेळता त्यात पडल्याचे आढळून आले आहे. कोपरखैरणे पोलिसांनी याप्रकरणी अकस्मात मृत्यूची नोंद करून पुढील तपासाला सुरुवात केली आहे.
या दुर्घटनेत मृत झालेला अंकित हा कोपरखैरणे सेक्टर-५ मध्ये राहण्यास होता. तसेच तो कोपरखैरणे सेक्टर-४ मधील जिजामाता कॉन्व्हेंट स्कूलमध्ये शिकत होता. बुधवारी सायंकाळी अंकित शाळेतून घरी आल्यानंतर तो परिसरातील मुलांसह खेळण्यासाठी बाहेर पडला होता. यावेळी अंकित खेळत असताना महापालिका शाळेच्या बाजूला इमारतीच्या बांधकामासाठी खोदण्यात आलेल्या खड्ड्यात पाय घसरून पडला. यावेळी अंकितसह खेळणाऱ्या मुलांनी तत्काळ याबाबतची माहिती आपल्या पालकांना दिल्यानंतर नागरिकांनी त्याठिकाणी धाव घेतली. त्यानंतर त्यांनी खड्ड्यातील पाण्यात बुडालेल्या अंकितला बाहेर काढून रुग्णालयात नेले. मात्र त्यापूर्वीच त्याचा मृत्यू झाल्याचे डॉक्टरांनी घोषित केले.
