डोंबिवली : महापालिकेच्या बाजार व परवाना विभागामार्फत ज्या चिकन व मटण विक्रेत्यांनी अद्याप परवाना घेतलेला नाही अथवा घेतलेल्या परवान्याचे नूतनीकरण केलेले नाही, अशा टिटवाळा, मोहने येथील अनधिकृत चिकन व मटण विक्रेत्यांवर काल दिवसभरात धडक कारवाई करून त्यांच्या परवान्यांची तपासणी करण्यात आली.
या तपासणीमध्ये ८ चिकन व मटण विक्रेत्यांनी परवाना नूतनीकरण न केल्याने त्यांना विनापरवाना व्यवसाय करीत असल्याबाबत नोटीस बजावण्यात आल्या आहेत. तर ४ दुकानदारांचे वजनकाटे जप्त करण्यात आले आहेत. ज्या विक्रेत्यांनी परवाना घेतलेला नाही अशा १२ विक्रेत्यांकडून रक्कम ३०,००० रुपये दंड वसूल करण्यात आला आहे.
चिकन व मटण विक्रेत्यांनी तातडीने परवान्याचे नूतनीकरण करावे तसेच ज्या विक्रेत्यांनी अद्यापही परवाना काढलेला नाही अशा विक्रेत्यांनी तातडीने परवाना काढावा असे आवाहन उप आयुक्त (परवाना विभाग) वंदना गुळवे यांनी केले आहे. अशा प्रकारची कार्यवाही सातत्याने केली जाणार असल्याची माहिती परवाना विभागाचे सहाय्यक आयुक्त प्रसाद ठाकूर यांनी दिली आहे.
