भिवंडी : टीईटी पेपरफुटी प्रकरणात पोलीस कोठडीत असलेल्या बीड येथील प्रकाश मिसाळ आणि दिल्ली येथील अशोक कुमार शाव या दोन्ही आरोपींना मंगळवारी न्यायालयात हजर करण्यात आले. न्यायालयाने दोघांनाही १ ऑक्टोबरपर्यंत वाढीव पोलीस कोठडी सुनावली आहे.
दोन्ही आरोपींना २० सप्टेंबर रोजी अटक करण्यात आली होती. त्यानंतर न्यायालयाने प्रथम तीन दिवस आणि पुढे पाच दिवसांची पोलीस कोठडी सुनावली होती. आता तिसऱ्यांदा त्यांच्या पोलीस कोठडीत वाढ करण्यात आली आहे. प्रकाश मिसाळ याच्याकडे १८ परीक्षार्थींची यादी सापडल्याचे तपासात समोर आले आहे. तसेच प्रकाश मिसाळ आणि यापूर्वी अटक करण्यात आलेला आरोपी कपिल दहिया यांची पुण्यातील एका हॉटेलमध्ये भेट झाल्याचे पोलिसांच्या तपासात निष्पन्न झाले आहे. या भेटीदरम्यान त्यांच्यात इतर कोणाशी आर्थिक व्यवहार झाले होते का, याबाबत पोलिसांकडून चौकशी करण्यात येत आहे.
या प्रकरणातील आर्थिक व्यवहार तसेच इतर बाबींचा तपास करण्यासाठी आरोपींच्या पोलीस कोठडीत वाढ करण्यात आली आहे. पुढील तपासानंतर या प्रकरणातील अधिक माहिती स्पष्ट होणार आहे.
