मुंबई : आसनगाव-कसारा तिसरा मार्ग आणि कसारा यार्डातील अप यार्ड मार्गाच्या विस्ताराच्या कामासाठी मध्य रेल्वेकडून कसारा येथे ७ ते १८ ऑक्टोबरदरम्यान १२ दिवस विशेष ट्रॅफिक व पॉवर ब्लॉक घेण्यात येणार आहेत. या कामाच्या पहिल्या टप्प्यात ७ ते ९ ऑक्टोबरदरम्यान उपनगरीय तसेच मेल-एक्स्प्रेस गाड्यांच्या वाहतुकीत बदल करण्यात आला आहे.
७ आणि ८ ऑक्टोबर रोजी दुपारी ३.३५ ते रात्री ८.३५ वाजेपर्यंत, तर ९ ऑक्टोबर रोजी मध्यरात्री १२.३० ते पहाटे ५.३० वाजेपर्यंत ब्लॉक राहणार आहे. कसारा-खर्डी आणि उंबरमाळी-कसारा दरम्यानच्या अप-डाऊन मुख्य मार्गावर तसेच कसारा स्थानकातील प्लॅटफॉर्म क्रमांक १, ३, ४ आणि अप यार्डमध्ये हे काम करण्यात येईल.
७ व ८ ऑक्टोबर रोजी सीएसएमटी-कसारा लोकलमधील १३.१०, १४.१७, १४.४६ आणि १६.५० वाजताच्या गाड्या आसनगावपर्यंतच धावतील. कसारा-सीएसएमटीच्या १५.३५, १६.१६, १७.०२ आणि १८.१७ वाजताच्या लोकल आसनगावहून अनुक्रमे १६.१२, १६.५४, १७.३९ आणि १८.५४ वाजता सुटतील.
७ व ८ ऑक्टोबर रोजी ब्लॉकपूर्वी कसारासाठी सीएसएमटीहून शेवटची लोकल दुपारी १२.३० वाजता, तर कसारा-सीएसएमटी शेवटची लोकल दुपारी १४.४२ वाजता सुटेल. ब्लॉकनंतर कसारासाठी पहिली लोकल सीएसएमटीहून १८.२८ वाजता, तर सीएसएमटीसाठी कसाराहून पहिली लोकल २०.३५ वाजता सुटणार आहे.
८ आणि ९ ऑक्टोबरच्या मध्यरात्री सीएसएमटी-कसारा २२.४७ वाजताची व ९ ऑक्टोबरला ००.०८ वाजताची लोकल, टिटवाळा-ठाणे २३.१४ वाजताची आणि कसारा-सीएसएमटी ०३.५१ वाजताची लोकल रद्द करण्यात आली आहे.
काही लांब पल्ल्याच्या गाड्यांच्या सुटण्याच्या वेळेत बदल करण्यात आला आहे. एलटीटी-बनारस एक्स्प्रेस, एलटीटी-पाटलीपुत्र एक्स्प्रेस, सीएसएमटी-अमृतसर एक्स्प्रेस, सीएसएमटी-बनारस महानगरी एक्स्प्रेस आणि एलटीटी-गोरखपूर कुशीनगर एक्स्प्रेस या गाड्या नियोजित वेळेपेक्षा उशिरा रवाना होतील.
गाड्यांना अतिरिक्त विलंब होण्याची शक्यता
गोरखपूर-एलटीटी एक्स्प्रेस, पुष्पक एक्स्प्रेस, अयोध्या कॅन्ट-एलटीटी एक्स्प्रेस, बलिया-दादर एक्स्प्रेस आणि जननेश्वरी एक्स्प्रेससह काही गाड्या इगतपुरी येथे नियंत्रित करण्यात येणार आहेत. दादर-गोरखपूर एक्स्प्रेसला खर्डी येथे एक तास, तर एलटीटी-राजगीर एक्स्प्रेसला अटगाव येथे ३० मिनिटे थांबविण्यात येणार आहे. भुसावळ विभागातही काही गाड्यांना ३० मिनिटांपासून १ तास २५ मिनिटांपर्यंत विलंब होण्याची शक्यता आहे. ब्लॉकमुळे गाड्यांचे नियमन आणि एकत्रित वाहतूक झाल्याने काही गाड्यांच्या वेळेत अतिरिक्त विलंब होऊ शकतो.
