स्वीटी भागवत/मुंबई
मुंबई मेट्रो मार्ग ५ च्या (ठाणे-भिवंडी-कल्याण) चाचणीची तयारी अंतिम टप्प्यात पोहोचली आहे. मुंबई महानगर प्रदेश विकास प्राधिकरणाने (एमएमआरडीए) ७ सप्टेंबरपासून १२.६ किलोमीटरच्या मार्गिकेवर २५,००० व्होल्टचा उच्चदाब वीजप्रवाह सुरू करण्यास सुरुवात केली आहे.
कापूरबावडी ते धामणकर नाका स्थानकांदरम्यानच्या अप आणि डाऊन अशा दोन्ही मार्गिकांवर हा वीजप्रवाह सोडला जात आहे. याशिवाय कशेळी डेपोमधील प्रवेश-बाहेर पडण्याचे मार्ग आणि तात्पुरत्या शेडच्या ट्रॅकवरील ओव्हरहेड वायर्सचेही ऊर्जीकरण केले जात आहे. या पार्श्वभूमीवर, एमएमआरडीएने सार्वजनिक सुरक्षेचा इशारा जारी केला असून नागरिकांनी ओव्हरहेड वायर्सच्या जवळ न जाण्याचे आणि त्या परिसरात कोणतेही काम न करण्याचे आवाहन केले आहे.
वीजप्रवाह सुरू झाल्यानंतर या तारा २४ तास ‘लाइव्ह’ मानल्या जातील आणि अनधिकृत प्रवेशास सक्त मनाई असेल. मेट्रो ५ च्या पहिल्या टप्प्यात ठाणे-कापूरबावडी ते भिवंडीतील धामणकर नाका या भागाचा समावेश असून येथील बांधकाम पूर्ण झाले आहे. भिवंडीपुढील आणि कल्याणच्या दिशेने असलेल्या उर्वरित मार्गाचे काम अद्याप सुरू झालेले नाही.
मेट्रो मार्ग ५ हा वडाळा ते कासारवडवली दरम्यान चालणाऱ्या मेट्रो मार्ग ४ शी जोडला जाणार असल्याने हा विकास अत्यंत महत्त्वाचा आहे. हे दोन्ही कॉरिडॉर कार्यरत झाल्यानंतर प्रवाशांना ठाणे आणि भिवंडी दरम्यान थेट मेट्रो प्रवासाचा पर्याय उपलब्ध होईल, ज्यामुळे रस्त्यावरील वाहतूककोंडीतून मोठा दिलासा मिळणे अपेक्षित आहे.
वर्षअखेरीस मेट्रो मार्ग सुरू होण्याची शक्यता
वीजप्रवाह सुरू झाल्यानंतर एमएमआरडीए पुढील १५ ते २० दिवस ओव्हरहेड इलेक्ट्रिकल सिस्टीम आणि संबंधित उपकरणांची कसून तपासणी करेल. या तपासणीदरम्यान आढळणाऱ्या त्रुटी दूर केल्यानंतर मार्गिका चाचणीसाठी खुली केली जाईल. त्यानंतरची चाचणी प्रक्रिया सुमारे सहा महिने चालण्याची शक्यता असून, २०२६ च्या अखेरपर्यंत मेट्रो ५ च्या पहिल्या टप्प्यात प्रवासी सेवा सुरू करण्याचे लक्ष्य ठेवण्यात आले आहे.
