ठाणे : शिवसेना (उद्धव बाळासाहेब ठाकरे) पक्षाचे मानपाडा विभागप्रमुख प्रदीप पूर्णेकर यांच्या हत्येला एक महिना उलटला, तरी हत्येमागील नेमके कारण अद्याप समोर आलेले नाही. या प्रकरणातील पाच आरोपी न्यायालयीन कोठडीत असून, हत्येचा उद्देश शोधण्यासाठी तपास सुरू असल्याची माहिती सहपोलीस आयुक्त पंजाबराव उगले यांनी बुधवारी दिली.
२९ सप्टेंबर रोजी मानपाडा येथील कार्यालयात घुसून पूर्णेकर यांच्यावर गोळीबार करण्यात आला. त्यानंतर त्यांच्यावर चॉपरने वार करून त्यांची हत्या करण्यात आली. या प्रकरणामागे माजी नगरसेविका मीनाक्षी शिंदे आणि त्यांचे पती राजेंद्र शिंदे यांचा सहभाग असल्याचा आरोप पूर्णेकर कुटुंबीयांनी केला आहे. त्यांच्या अटकेच्या मागणीसाठी ठाण्यातील विविध भागांत रास्ता रोको आंदोलन करण्यात आले होते.
मंगळवारी रात्री या आंदोलनाला हिंसक वळण लागल्याने पोलिसांनी लाठीमार केला. त्यानंतर कुटुंबीयांनी तपासाच्या दिशेबाबत प्रश्न उपस्थित केले. या पार्श्वभूमीवर वरिष्ठ पोलीस अधिकाऱ्यांनी पत्रकार परिषद घेऊन तपासाची माहिती दिली.
पूर्णेकर कुटुंबीयांनी पोलिसांकडे सादर केलेल्या सीसीटीव्ही चित्रफितीत काही संशयित पवारनगर परिसरात चहा पिताना दिसत असल्याचा दावा केला आहे. हत्येच्या काही तास आधीच्या या चित्रफितीत दिसणाऱ्या हेल्मेटधारी व्यक्तीचे कपडे आणि राजेंद्र शिंदे यांचे कपडे सारखे असल्याचेही कुटुंबीयांचे म्हणणे आहे. तसेच, आरोपी अमित सिंह याच्या भूमिकेबाबतही त्यांनी संशय व्यक्त केला आहे.
या दाव्यांबाबत बोलताना सहपोलीस आयुक्त उगले यांनी संबंधित चित्रफीत न्यायवैद्यक प्रयोगशाळेकडे तपासणीसाठी पाठवण्यात आल्याचे स्पष्ट केले. तिच्या तपासणीतून काय निष्पन्न होते, याकडे लक्ष लागले आहे.
दरम्यान, आंदोलनामुळे रुग्णवाहिका आणि प्रवासी वाहने वाहतूक कोंडीत अडकल्याचे पोलिसांनी सांगितले. कायदा हातात घेणाऱ्यांविरोधात नियमानुसार कारवाई केली जाईल, असा इशाराही उगले यांनी दिला. हत्येचा उद्देश आणि संभाव्य कटाबाबत अद्याप स्पष्टता नसल्याने तपासाच्या निष्कर्षांची प्रतीक्षा आहे.
