ठाणे : ठाणे महापालिका निवडणुकीतील जागावाटपाच्या मुद्द्यावर शेवटपर्यंत ताणून धरलेल्या भाजपला शिवसेना (शिंदे गट) ने अखेर जागावाटपात ‘कात्रजचा घाट’ दाखवल्याची चर्चा राजकीय वर्तुळात रंगली आहे. भाजपने जाहीर केलेल्या उमेदवारांच्या यादीवरून हे चित्र स्पष्ट झाले असून, ज्या ठिकाणी भाजपचा प्रभाव नगण्य आहे अशा मुंब्रा व कळवा परिसरातील तब्बल नऊ जागा भाजपच्या वाट्याला आल्याने शिवसेनेने भाजपला निकालाआधीच धोबीपछाड दिल्याचे बोलले जात आहे.
उमेदवारी अर्ज भरण्याच्या शेवटच्या दिवसापर्यंत भाजप व शिवसेनेत जागावाटपावरून तिढा सुटत नव्हता. भाजपच्या हट्टामुळे शिवसेनेच्या नाकीनऊ येत असल्याचे चित्र होते. युती तुटते की काय, अशीही परिस्थिती निर्माण झाली होती. मात्र अखेरच्या क्षणी युती जाहीर झाली. ठाण्यात शिंदे सेनेला ८७, भाजपला ४० आणि मुंब्रा विकास आघाडीला ४ जागा असे समीकरण ठरले असले, तरी भाजपच्या वाट्याला आलेल्या ४० पैकी मुंब्रा व कळव्यातील ९ जागा प्रत्यक्षात ‘असून नसल्यासारख्या’ असल्याची चर्चा आहे. या भागांत भाजपचा मतदाराधार कमकुवत असल्याने या जागा जिंकणे भाजपसाठी मोठे आव्हान ठरणार आहे.
युतीच्या जागावाटपावर भाजपचे आमदार संजय केळकर यांनीही उघडपणे नाराजी व्यक्त केली आहे. उमेदवारी अर्ज भरण्याच्या एक दिवस आधी रात्री युती जाहीर झाली. मात्र अपेक्षेपेक्षा कमी जागा मिळाल्याने भाजपच्या पदाधिकाऱ्यांमध्ये अस्वस्थता पसरली आहे. भाजपने ५५ जागांची अपेक्षा व्यक्त केली होती, मात्र सरतेशेवटी केवळ ४० जागांवर समाधान मानावे लागले.
एकूणच, ठाण्यातील जागावाटपात शिवसेनेने वरचढ डाव खेळत भाजपला अडचणीच्या जागांवर समाधान मानायला लावल्याचे चित्र असून, याचे पडसाद निवडणूक निकालात कसे उमटतात, याकडे सर्वांचे लक्ष लागले आहे.
