उल्हासनगर : उल्हासनगरमधील नशामुक्ती केंद्राच्या उद्घाटनाच्या कार्यक्रमातच राज्यराजकारणाला ठिणगी देणारे वक्तव्य समोर आले. भाजप-शिवसेना (शिंदे गट) युतीवर सुरू असलेल्या गोंधळात खासदार डॉ. श्रीकांत शिंदे यांनी थेट भाजप प्रदेशाध्यक्ष रवींद्र चव्हाण यांना लक्ष्य करत युती टिकवायची की नाही ? हा भाजपचा प्रश्न आम्ही युतीत काम करतो आणि पुढेही करत राहणार असल्याची ग्वाही खासदार शिंदे यांनी दिली.
उल्हासनगरातील कॅम्प क्रमांक ३ येथील बालकनजी बारी ट्रस्ट संचालित 'सोबर लाईफ' महिला नशामुक्ती केंद्राचे उद्घाटन खासदार श्रीकांत शिंदे यांच्या हस्ते पार पडले. उद्घाटन सोहळ्यात पत्रकारांनी युतीबाबत प्रश्न विचारल्यावर श्रीकांत शिंदे यांनी ठाम भूमिका घेत स्पष्ट केले, शिवसेना-भाजप युतीचा पाया माजी प्रधानमंत्री अटल बिहारी वाजपेयी आणि बाळासाहेब ठाकरे यांनी रचला. आम्ही युतीत काम करीत आहोत आणि पुढेही युतीतच काम करणार आहोत. युती टिकवायची की नाही हा आमचा प्रश्न नाही, हा प्रश्न त्यांनी विचारावा; अशा वक्तव्यांची आम्ही दखल घेत नाही.
राजकीय वर्तुळात असे मानले जात आहे की, अलीकडेच रवींद्र चव्हाण यांनी २ डिसेंबरपर्यंत युती टिकवायची आहे, तोपर्यंत त्यांना आम्ही सहन करू, असे विधान केले होते. त्यावर आज श्रीकांत शिंदेंच्या वक्तव्याने थेट प्रत्युत्तर दिल्याचे दिसून येते. यामुळे आगामी उल्हासनगर महापालिका निवडणुकीच्या पार्श्वभूमीवर युतीत अंतर्गत तणाव शिगेला पोहोचल्याचे संकेत मिळत आहेत.
उद्घाटन कार्यक्रमात ट्रस्टच्या उपाध्यक्षा जया मोहन साधवानी, सचिव मोहन साधवानी, राजेंद्र चौधरी, माजी महापौर मीना आयलानी, डॉ. आभा नगराळे, माजी आमदार पप्पू कलानी, मनोज लासी, कमलेश निकम, दिलीप गायकवाड यांसह विविध पक्षांचे पदाधिकारी उपस्थित होते. सामाजिक उपक्रमाने सकारात्मक संदेश दिला असला, तरी त्या मंचावर झालेल्या खासदार श्रीकांत शिंदेंच्या तिखट राजकीय प्रतिक्रियेमुळे युती राजकारणावर पुन्हा ज्वाला प्रज्वलित झाल्या आहेत. राजकीय निरीक्षकांचे म्हणणे आहे की, आगामी निवडणुकीच्या पार्श्वभूमीवर आजचे वक्तव्य राज्याच्या राजकीय समीकरणात महत्त्वाचे ठरणार आहे.
