ठाणे: दिल्ली-पुण्यानंतर ठाणे शहरात देखील हवा प्रदूषणाचा प्रश्न ऐरणीवर आला आहे. हवेचा गुणवत्ता निर्देशांक ढासळल्याने ठाणेकरांच्या आरोग्याचा प्रश्न गंभीर निर्माण झाला आहे. दरम्यान, ठाणे शहरात मागील काही दिवस थंड वातावरण असल्याने दिल्ली प्रमाणेच ठाण्यात देखील प्रदूषण वाढत असल्याचे दिसून येत आहे. ठाणे शहरातील वाढती वाहने आणि त्यांचा धूर तर इमारतींची बेसुमार बांधकामे यामुळे ठाण्याची हवा प्रदूषित झाली असून ठाणेकरांचा श्वास गुदमरू लागला आहे. विशेष म्हणजे वाहनांची सततची वर्दळ, बांधकामे यांच्या जोडीला मेट्रोची भव्य बांधकामे यामुळे घोडबंदर परिसरातील हवा आरोग्यासाठी अपायकारक ठरत आहे. दिल्ली, मुंबईपाठोपाठ ठाण्याची हवा देखील बिघडू लागल्याने ठाण्यात श्वसनाच्या आजाराने डोके वर काढले आहे.
ठाणे महापालिकेच्या प्रदूषण नियंत्रण विभागाकडील नोंदीनुसार ठाणे शहरातील हवेची गुणवत्ता डिसेंबर महिन्यात खालावत चालली असल्याचे समोर आले आहे. डिसेंबर महिन्याच्या सुरुवातीच्या काळात सर्वांत कमी असलेला हवा गुणवत्ता निर्देशांक, पंधरवड्यानंतर १८३ एवढा नोंदवण्यात आला आहे. हा हवा गुणवत्ता निर्देशांक मध्यम प्रदूषित या वर्गवारीमध्ये येत असला तरी नवीन ठाणे समजल्या जाणाऱ्या घोडबंदर येथे हवेची पातळी अत्यंत खालावली आहे. घोडबंदरच्या हवेची गुणवत्ता १९० वर पोहचली आहे, तर उपवन परिसरात १७६ एवढी गुणवत्ता नोंदविण्यात आली आहे.
एअर क्वालिटी इंडेक्सनुसार ठाणे शहरात हवा गुणवत्ता निर्देशांक सरासरी १८३ नोंद झाला आहे. विशेष म्हणजे घोडबंदर भागातील हवा सर्वांत जास्त खराब असल्याचे आकडेवारीतून समोर आले आहे. या भागात दिवसेंदिवस वाहनांची वाढती संख्या तसेच इमारतींच्या बांधकामामुळे हवेत बदल झाले असल्याचे बोलले जात आहे.
वाढत्या नागरीकरणामुळे तसेच विविध विकासकामांमुळे आणि धूळ, धुराच्या व्याप्तीने शहरात वायुप्रदूषणाची पातळी काही अंशी वाढली आहे. ठाणे महापालिकेने हवा प्रदूषण रोखण्यासाठी विविध उपाययोजना अंमलात आणल्या आहेत. त्याचसोबत, हवा प्रदूषणाच्या तक्रारी नोंदविण्यासाठी ठाणे महापालिकेने हेल्पलाईन ८६५७८८७१०१ या व्हॉट्सअॅप क्रमांकावर छायाचित्रासह तक्रार नोंदवावी, असे आवाहन ठाणे महापालिकेने केले आहे.
हवेच्या गुणवत्तेचे मापदंड
एअर क्वालिटी इंडेक्सनुसार ० ते ५० एअर क्वालिटी इंडेक्सची नोंद झाल्यास हवेची गुणवत्ता चांगली असल्याचा निष्कर्ष काढला जातो. ५१ ते १०० समाधानकारक, १०१ ते २०० मध्यम गुणवत्ता, २०१-३०० प्रदूषित, ३०१ ते ४०० अत्यंत प्रदूषित आणि ४०१-५०० गंभीर स्वरूपाचे प्रदूषण मानले जाते.
