ठाणे : ठाणे आणि नवी मुंबई परिसरातील वाढती वाहतूककोंडी कमी करून प्रवाशांना जलवाहतुकीचा पर्याय उपलब्ध करून देण्याच्या दृष्टीने महाराष्ट्र सागरी मंडळाने महत्त्वाचे पाऊल उचलले आहे. ठाण्यातील मीठबंदर, मुलुंड, ऐरोली आणि वाशी येथे प्रवासी जेट्टी उभारण्यासाठी वन विभागाच्या मंजुरीकरिता अर्ज करण्यात आला आहे. या चार जेट्टींच्या माध्यमातून ठाणे आणि नवी मुंबई परिसरातील जलवाहतूक व्यवस्था विकसित करण्याचे नियोजन आहे.
प्रस्तावित जेट्टींच्या ठिकाणी प्रवाशांसाठी तिकीट खिडक्या, प्रतीक्षालय, स्वच्छतागृहे, पोर्टेबल केबिन, तात्पुरती आसनव्यवस्था आणि पिण्याच्या पाण्याची सुविधा उपलब्ध करून देण्यात येणार आहे. त्यामुळे जलवाहतूक सेवा सुरू झाल्यानंतर प्रवाशांना चढ-उतार करण्यासाठी आवश्यक पायाभूत सुविधा मिळण्याची अपेक्षा आहे.
महाराष्ट्र सागरी मंडळाच्या जलवाहतूक विकासाच्या व्यापक आराखड्यात भाईंदर, कल्हेर, कोलशेत आणि डोंबिवलीसह अन्य ठिकाणांचाही समावेश आहे. त्यामुळे ठाणे खाडी परिसरात टप्प्याटप्प्याने जलवाहतुकीचे जाळे विकसित करण्याचे नियोजन आहे.
पर्यावरणीय मंजुरीचे आव्हान
मीठबंदर येथील प्रस्तावित जेट्टीसाठी पर्यावरणविषयक परवानग्या महत्त्वाच्या ठरणार आहेत. महाराष्ट्र किनारपट्टी क्षेत्र व्यवस्थापन प्राधिकरणाच्या २६ ऑगस्ट २०२५ रोजीच्या बैठकीच्या इतिवृत्तानुसार, मीठबंदर येथे ७० मीटर लांबीची जेट्टी उभारण्याचा प्रस्ताव विचाराधीन होता. प्रस्तावित जागेचा काही भाग पर्यावरणदृष्ट्या संवेदनशील क्षेत्र, चिखलपट्टी आणि कांदळवनाच्या ५० मीटर संरक्षित पट्ट्यात येत असल्याची नोंद करण्यात आली होती. त्यामुळे वन विभागाची मंजुरी आणि पर्यावरणदृष्ट्या संवेदनशील क्षेत्राशी संबंधित ना-हरकत प्रमाणपत्र मिळाल्यानंतरच किनारपट्टी नियमन क्षेत्राच्या (सीआरझेड) अनुषंगाने पुढील विचार करण्याचे नमूद करण्यात आले होते. परिणामी, आवश्यक पर्यावरणीय आणि वनविषयक परवानग्या मिळविणे हे जेट्टीच्या उभारणीतील महत्त्वाचे आव्हान ठरणार आहे.
रस्ते वाहतुकीला पर्याय मिळण्याची अपेक्षा
ठाणे, मुलुंड आणि नवी मुंबई परिसरात वाहनांची वाढती संख्या आणि वारंवार होणारी वाहतूककोंडी लक्षात घेता जलवाहतूक हा पर्यायी प्रवासाचा उपयुक्त मार्ग ठरू शकतो. मात्र, प्रस्तावित जेट्टींची उभारणी, आवश्यक परवानग्या आणि प्रत्यक्ष जलवाहतूक सेवा सुरू होण्याची प्रक्रिया पूर्ण झाल्यानंतरच या प्रकल्पाचा प्रवाशांना कितपत फायदा होईल, हे स्पष्ट होणार आहे.
