ठाणे : शासनाकडून ठाणे महापालिकेला ७ सहाय्यक आयुक्त मिळाले आहेत. त्यातील चार सहाय्यक आयुक्तांनी आपल्या पदाचा कार्यभार स्वीकारला आहे. उर्वरित तीन सहाय्यक आयुक्त अद्यापही रूजू झालेले नाहीत. त्यातही महापालिकेत १८ सहाय्यक आयुक्त पदे असताना त्यात महापालिकेचे २ पदे भरण्यात आली आहेत. तर शासनाकडून ९ पैकी ७ सहाय्यक आयुक्त देण्यात आले आहेत. त्यानुसार आजही पालिकेत ९ सहाय्यक आयुक्त पदे रिक्त असल्याची माहिती समोर आली आहे.
मागील कित्येक वर्षांपासून ठाणे महापालिकेत सहाय्यक आयुक्तांची पदे रिक्त होती. ती पदे भरली जावीत, यासाठी महापालिकेकडून शासनाकडे पाठपुरावा केला जात होता. त्यानंतर मागील आठवड्यात शासनाने एकाच वेळेस ७ सहाय्यक आयुक्त महापालिकेला देऊ केली आहेत. त्यानंतर यातील ४ जणांनी महापालिकेत आपला कार्यभार स्वीकारला आहे. परंतु उर्वरित तीन सहाय्यक आयुक्त हे केव्हा रूजू होणार हे महापालिकेला सांगता येईना. परंतु येत्या काही दिवसांत ते रूजू होतील, अशी अपेक्षा पालिकेला आहे. एक ते दीड वर्षांमध्ये पालिकेचे काही सहाय्यक आयुक्त सेवानिवृत्त झाले तर, शासन नियुक्त सहाय्यक आयुक्तांची इतरत्र बदली झाली. त्यांच्या जागी शासनाने नवीन सहाय्यक आयुक्तांची नेमणूक केली नव्हती.
दरम्यान, सहाय्यक आयुक्त उपलब्ध व्हावेत, यासाठी महापालिकेने राज्य शासनाकडे पत्रव्यवहार केला होता. ही मागणी मान्य करत राज्य शासनाने ठाणे महापालिकेला एकाच वेळेस सात सहाय्यक आयुक्त उपलब्ध करून दिले आहेत.
दुसरीकडे ठाणे महापालिकेचे सहाय्य्क आयुक्त भालचंद्र घुगे यांच्याकडे उथळसर समितीच्या सहाय्यक आयुक्तपदाची जबाबदारी देण्यात आली आहे. कार्यालयीन अधीक्षक राजेंद्र गिरी यांच्याकडे दिवा प्रभाग समितीचा सहाय्यक आयुक्तपदाचा पदभार काढण्यात आला असून त्यांच्याकडे कळवा प्रभाग समिती सहाय्यक आयुक्तपदाची जबाबदारी देण्यात आली आहे.
नवा कार्यभार
नव्याने रूजू झालेल्या सहाय्यक आयुक्तांना विविध प्रभाग समितीचा कार्यभार सोपविण्यात आला आहे. त्यानुसार दिवा प्रभाग समितीच्या सहाय्यक आयुक्तपदी शिवप्रसाद नागरगोजे, वर्तकनगर प्रभाग समिती विजय कावळे, लोकमान्य-सावरकरनगर प्रभाग समिती सोमनाथ बनसोडे, माजिवडा-मानपाडा प्रभाग समिती सोनल काळे यांची नियुक्ती करण्यात आली आहे. यापूर्वी या प्रभाग समित्यांमध्ये कार्यरत असलेल्या कार्यालयीन अधिक्षक तनुजा रणदिवे, कार्यालयीन उपअधीक्षक स्मिता सुर्वे आणि ललिता जाधव यांच्याकडील सहाय्यक आयुक्तपदाचा अतिरिक्त पदभार काढून घेण्यात आला आहे.
