नवनीत बऱ्हाटे / उल्हासनगर
उल्हासनगर महानगरपालिकेच्या निवडणुकीचा निकाल आज जाहीर झाला असून, या निकालाने शहराच्या राजकारणात प्रचंड अनिश्चितता निर्माण केली आहे. ७८ जागांच्या महापालिकेत कोणत्याही पक्षाला स्पष्ट बहुमत न मिळाल्याने सत्ता स्थापनेसाठी आता राजकीय हालचालींना वेग आला आहे. बहुमतासाठी आवश्यक असलेला ४० जागांचा आकडा कुणालाच गाठता न आल्याने उल्हासनगरचा कौल सध्या लटकलेला आहे.
या निवडणुकीत भाजपने ३७ जागांवर विजय मिळवत पहिल्या क्रमांकावर मजल मारली, तर शिवसेना (शिंदे गट) ३६ जागांवर दुसऱ्या क्रमांकावर राहिली. वंचित बहुजन आघाडीला २, काँग्रेसला १, स्थानिक साई पक्षाला १, तर १ अपक्ष उमेदवार विजयी झाला आहे. विशेष म्हणजे शिवसेना (उद्धव बाळासाहेब ठाकरे) आणि मनसे या दोन्ही पक्षांचा एकही उमेदवार निवडून आला नाही.
मतमोजणी केंद्रावर तणावाचे वातावरण
सकाळपासूनच मतमोजणी केंद्र परिसरात प्रचंड गर्दी होती. प्रत्येक फेरीचा निकाल लागल्यानंतर आघाडी-पिछाडीचे चित्र बदलत असल्याने उमेदवार, कार्यकर्ते आणि समर्थकांमध्ये तणाव स्पष्टपणे दिसून येत होता. काही ठिकाणी विजयाचा जल्लोष, तर काही ठिकाणी शांत निराशा पाहायला मिळाली. सोशल मीडियावर आकड्यांची देवाणघेवाण, फोनाफोनी आणि चर्चांचे फड दिवसभर रंगले होते.
महापौरपदासाठी राजकीय गणिते
महापौरपदासाठी बहुमताचा आकडा गाठता न आल्याने आता खरी राजकीय कसोटी सुरू झाली आहे. भाजपकडून सर्वाधिक जागा मिळाल्याचा दावा करत महापौरपदावर दावा केला जात आहे. मात्र, सत्ता स्थापन करण्यासाठी वंचित, अपक्ष आणि स्थानिक पक्षांचा पाठिंबा निर्णायक ठरणार आहे. भाजप-शिंदे गट युतीची शक्यता, तसेच पर्यायी सत्तासमीकरणांची चर्चा शहरात जोर धरू लागली आहे.
पुढील घडामोडींकडे लक्ष
या निकालानंतर उल्हासनगरच्या राजकारणात स्पष्ट बहुमताऐवजी अनिश्चितता, वाटाघाटी आणि सौदेबाजीचे राजकारण सुरू झाले आहे. येत्या काही दिवसांत बंद दरवाजाआड होणाऱ्या बैठका, अचानक बदलणाऱ्या भूमिका आणि युती-आघाडीचे निर्णय शहराचे भवितव्य ठरवणार आहेत. आजच्या निकालाने एक गोष्ट मात्र स्पष्ट केली आहेउल्हासनगरमध्ये सत्ता स्थापनेसाठीची खरी लढाई आता सुरू झाली आहे.
