उल्हासनगर : उल्हासनगर महानगरपालिका निवडणुका तोंडावर असताना पॅनेल क्रमांक १९ मधील मतदार यादीत समोर आलेल्या एका विचित्र नोंदीने संपूर्ण शहरात खळबळ उडवली आहे. मतदार क्रमांक २१, ७५९ वर ५७ वर्षीय 'महाराष्ट्र' नावाची महिला मतदान करणार असल्याची अधिकृत नोंद मिळाल्याने निवडणूक प्रक्रियेची विश्वसनीयता आणि पारदर्शकता यावर मोठा प्रश्नचिन्ह उभा राहिला आहे.
२० नोव्हेंबर रोजी जाहीर झालेल्या मतदार यादीत 'महाराष्ट्र' नावाची नोंद दिसताच नागरिक, राजकीय कार्यकर्ते आणि सामाजिक संघटनांमध्ये चर्चा सुरू झाली. राज्याचे नावच एका व्यक्तीच्या नावावर नोंदले जाणे, ही बाब केवळ हास्यास्पद नसून अत्यंत गंभीर त्रुटी मानली जात आहे.
मतदार नोंदणी प्रक्रियेत नाव, पत्ता, ओळखपत्रांची पडताळणी, घरभेट यांसारखे अनेक टप्पे असतात. अशा प्रक्रियेतून गेल्यानंतर ही चूक होणे अशक्यसदृश असल्याचे नागरिकांचे म्हणणे आहे. त्यामुळे ही केवळ टंकत्रुटी नसून मते वाढवण्याचा किंवा फेरफार करण्याचा डावपेच होता का? असा संशय व्यक्त केला जात आहे. उल्हासनगरात मतदार याद्यांमध्ये चुकीची किंवा मृत व्यक्तींची नावे, दुबार नोंदी, बाहेरील व्यक्तींची भर अशा तक्रारी वारंवार समोर येत होत्या. त्यात आता 'महाराष्ट्र' या नावाची नोंद म्हणजे तिळावर तिळ ठेवण्यासारखी अनुभूती नागरिकांना झाली आहे.
निवडणुकीच्या काही दिवस आधीच अशा गंभीर चुकांची उघडकीस येणे हा निवडणूक प्रक्रियेवरील विश्वासाला धक्का देणारा मुद्दा ठरत आहे.
नागरिकांकडून सखोल तपासाची मागणी
या प्रकरणाच्या तातडीने चौकशीसाठी नागरिकांकडून निवडणूक विभाग आणि महापालिकेवर दबाव वाढू लागला आहे. संबंधित नोंदीची सखोल तपासणी करून चूक तत्काळ दुरुस्त करण्याची मागणी नागरिकांमार्फत केली जात आहे. तसेच अशा नोंदी मागे कोणतेही राजकीय किंवा प्रशासनिक हस्तक्षेप आहेत का, याचा उलगडा करून निवडणूक विभागाने अधिकृत स्पष्टीकरण द्यावे अशी मागणी देखील होत आहे. उल्हासनगर मनपा निवडणुकीच्या रणधुमाळीत समोर आलेली ही विचित्र नोंद येणाऱ्या दिवसांत मोठा राजकीय मुद्दा बनण्याची चिन्हे दिसत आहेत.
