मुंबई : प्रसिद्ध चित्रपट निर्माते आणि सेन्सॉर बोर्डाचे माजी अध्यक्ष पहलाज निहलानी (वय ७१) यांचे गुरुवारी मुंबईतील त्यांच्या राहत्या घरी हृदयविकाराच्या झटक्याने निधन झाले. मुंबईतील सांताक्रूझ येथील स्मशानभूमीत त्यांच्यावर अंत्यसंस्कार करण्यात आले.
निहलानी यांनी १९८२ मध्ये 'हथकडी' या सिनेमाद्वारे निर्माता म्हणून आपल्या कारकीर्दीची सुरुवात केली. त्यानंतर त्यांनी 'आँखे', 'अंदाज', 'शोला और शबनम', 'तलाश', 'रंगीला राजा' आणि 'ज्युली 2' यांसारखे अनेक हिट सिनेमे दिले. २०१५ ते २०१७ या कालावधीत सेन्सॉर बोर्डाचे अध्यक्ष म्हणून त्यांनी काम केले होते.
अनेक अभिनेत्यांच्या कारकीर्दीत पहलाज निहलानी यांनी अत्यंत महत्त्वाची भूमिका बजावली. त्यांनी १९८६ मध्ये 'इल्झाम' या सिनेमाद्वारे गोविंदाला सिनेसृष्टीत लाँच केले आणि त्यानंतर 'आग ही आग' या सिनेमाद्वारे चंकी पांडेला या क्षेत्रात आणले.
पुढे, पहलाज निहलानी यांनी गोविंदा आणि चंकी पांडे यांची प्रमुख भूमिका असलेला 'आँखे' या सिनेमाची निर्मिती केलेली. १९९३ मध्ये प्रदर्शित झालेला हा सिनेमा त्या वर्षातील सर्वाधिक कमाई करणाऱ्या सिनेमांपैकी एक ठरला.