चेन्नई : तमिळ चित्रपटसृष्टीतील प्रसिद्ध संगीतकार देवा यांचे शनिवारी चेन्नई येथे निधन झाले. ते ७५ वर्षांचे होते. हृदयविकाराच्या झटक्याने त्यांची प्राणज्योत मालवली.
तमिळ 'गाना' संगीतशैलीला लोकप्रियतेच्या शिखरावर नेणारे आणि रजनीकांत, कमल हासन, विजय, अजित कुमार यांसारख्या आघाडीच्या अभिनेत्यांच्या चित्रपटांना अनेक लोकप्रिय गाणी देणारे संगीतकार म्हणून त्यांची ओळख होती.
चार दशकांच्या कारकिर्दीत त्यांनी ४०० हून अधिक चित्रपटांना संगीत दिले. देवा यांचे तमिळ भाषिक जनतेला दिलेले सर्वांत मोठे योगदान म्हणजे 'गाना' संगीतशैली. कामगारवर्गातील जीवनशैली, त्यांच्या आवडीनिवडी, तरुणाईच्या जगण्याचे प्रतिबिंब या संगीतात उमटते.
बोलीभाषेतील तमिळ शब्दांचा प्रभावी वापर आणि सामान्य माणसाच्या भावविश्वाशी असलेली जवळीक यामुळे देवा यांना या संगीतशैलीचे जनक म्हणून लोकप्रियता मिळाली.