वॉशिंग्टन : अमेरिकेचे परराष्ट्रमंत्री मार्को रुबियो आणि संरक्षणमंत्री पीट हेग्सेथ ज्या लष्करी तळावर वास्तव्याला आहेत तेथेच संशयास्पद ड्रोनने घिरट्या घातल्याने खळबळ माजली आहे. हे ड्रोन कोठून आले त्याबद्दलची माहिती अस्पष्ट आहे. या प्रकारामुळे सुरक्षेत वाढ करण्यात आली असून व्हाइट हाऊसमध्ये तातडीची बैठक बोलाविण्यात आली आहे. तसेच या दोन्ही नेत्यांना तेथून अन्यत्र हलविण्याचा विचारही सुरू आहे.
वॉशिंग्टनमधील सर्वात हायप्रोफाईल अमेरिकी लष्करी तळावर संशयास्पद ड्रोनने घिरट्या घातल्याने जगभरात खळबळ उडाली आहे. अमेरिकेतील एका इंग्रजी दैनिकानुसार, मार्को रुबियो आणि पीट हेगसेथ हे फोर्ट लेस्ली मॅकनेअर या लष्करी तळावर वास्तव्यास आहेत. या प्रकरणाशी संबंधित तीन व्यक्तींनी दिलेल्या माहितीनुसार या ड्रोनची अद्याप ओळख पटलेली नाही आणि ते कुठून आले हे अस्पष्ट आहे.
तातडीची बैठक
एका वरिष्ठ अधिकाऱ्याच्या मते, अमेरिका आणि इस्रायलने इराणवर केलेल्या हल्ल्यांमुळे सुरक्षा सतर्कता आधीच वाढवण्यात आली आहे. परिणामी, लष्कर संभाव्य धोक्यांवर बारकाईने लक्ष ठेवून आहे. गेल्या १० दिवसांत फोर्ट लेस्ली मॅकनेअरवर रात्रीच्या वेळी अनेक ड्रोन दिसले, ज्यामुळे सुरक्षा वाढवण्यात आली आणि व्हाईट हाऊसमध्ये तातडीची बैठक बोलावण्यात आली.
सतर्कतेचा इशारा
इराणकडून आखाती देशातील दूतावास उद्ध्वस्त केली जात असताना अमेरिकेने जगभरातील आपल्या दूतावासांसाठी सुरक्षा सतर्कतेचा इशारा जारी केला आहे. देशातील अनेक लष्करी तळांवरही सुरक्षा व्यवस्था कडक केली आहे. न्यू जर्सीमधील जॉइंट बेस मॅकगायर-डिक्स-लेकहर्स्ट आणि फ्लोरिडामधील मॅकडिल एअर फोर्स बेस येथील सुरक्षा पातळी 'चार्ली' पर्यंत वाढवण्यात आली आहे. याचा अर्थ हल्ला किंवा धोका अगदी जवळ आला आहे. याच्या वरची एकमेव पातळी 'डेल्टा' आहे, जी हल्ला आधीच झाला असेल किंवा अगदी जवळ आला असेल तेव्हा लागू होते.
फोर्ट मॅकनेअरवर ड्रोन दिसल्यानंतर, अधिकाऱ्यांनी रुबिओ आणि हेगसेथ यांच्या शिफ्टिंगचा विचार केला होता. तथापि, अद्याप कोणताही निर्णय करण्यात आलेला नाही. सहा महिन्यांपूर्वीच पीट हेगसेथ आणि मार्को रुबिओ यांचे ठिकाण उघड केले होते. सामान्यतः, अशा उच्च पदांवर असलेल्या व्यक्तींची ठिकाणे उघड केली जात नाहीत, कारण यामुळे सुरक्षेचा धोका निर्माण होऊ शकतो.
एअरबेस दोनदा बंद
मॅकडिल एअर फोर्स बेस, जेथे यूएस सेंट्रल कमांड (जी इराणविरुद्धच्या लष्करी कारवायांवर देखरेख करते) कार्यरत आहे, तोही या आठवड्यात दोनदा सुरक्षेसाठी बंद करण्यात आला होता. सोमवारी, एक संशयास्पद वस्तू सापडल्यानंतर अभ्यागत केंद्र अनेक तासांसाठी बंद ठेवण्यात आले, बुधवारी, आणखी एका सुरक्षा घटनेमुळे तातडीने स्थलांतराचा आदेश देण्यात आला. सुरक्षेच्या कारणास्तव अमेरिकन अधिकाऱ्यांनी लष्करी तळावर राहण्यास सुरुवात केली आहे.
यापूर्वीही ड्रोनच्या घटना
फोर्ट मॅकनेअरमध्ये राष्ट्रीय संरक्षण विद्यापीठ आणि पेंटागॉनमधील अनेक वरिष्ठ अधिकारी राहतात. हा तळ सहसा राजकीय नेत्यांसाठी राखीव नसतो, परंतु अलीकडे, ट्रम्प प्रशासनातील अनेक अधिकारी सुरक्षेच्या कारणास्तव तिथे राहत आहेत. हा तळ व्हाईट हाऊस आणि कॅपिटल हिलच्या अगदी जवळ आहे, परंतु त्याची सुरक्षा इतर लष्करी तळांइतकी मजबूत मानली जात नाही. अमेरिकन अधिकाऱ्यांच्या मते, अशा ड्रोनच्या घटना यापूर्वीही घडल्या आहेत.