लाहोर : पाकिस्तान आणि चीनमध्ये झालेल्या करारानुसार, पाकिस्तानला चीनकडून आठ प्रगत ‘हँगोर श्रेणी’च्या डिझेल-इलेक्ट्रिक पाणबुड्या मिळणार आहेत. या नवीन पाणबुड्यांच्या ताफ्यासह पाकिस्तान हिंदी महासागराच्या उत्तरेकडील भागात भारताला आव्हान देण्यासाठी आपली नौदल क्षमता वाढवण्याच्या तयारीत आहे.
पाकिस्तानचे नौदलप्रमुख ॲॅडमिरल नविद अशरफ यांनी सांगितले की, ‘‘चीनने तयार केलेल्या पाणबुड्या लवकरच पाकिस्तानी नौदलात सामील होतील. चीन आणि पाकिस्तानने संयुक्तपणे बांधलेल्या हँगोर-श्रेणीतील पाणबुड्यांची पहिली तुकडी २०२६ पर्यंत पाक नौदलाच्या सेवेत दाखल होण्याची अपेक्षा आहे.” पहिल्या चार पाणबुड्या चीनमध्ये तयार केल्या जात आहेत, तर शिपयार्ड अँड इंजिनीअरिंग वर्क्स येथे झालेल्या तंत्रज्ञान हस्तांतरण करारानुसार, उर्वरित चार पाणबुड्यांची निर्मिती पाकिस्तानध्ये केली जाईल.
रशिया भारताला ‘एसयू-५७’ लढाऊ विमाने देणार
भारताचे परराष्ट्रमंत्री एस. जयशंकर यांनी मॉस्कोमध्ये रशियाचे राष्ट्राध्यक्ष व्लादिमीर पुतिन यांची भेट घेतल्यानंतर रशियाने भारताला ‘एसयू-५७’ स्टेल्थ लढाऊ विमाने पुरवण्याची तयारी दाखवली आहे.
रशियन ‘एसयू-५७’ विमाने अमेरिकेच्या ‘एफ-३५’ला टक्कर देणारी मानली जातात. ‘एसयू-५७’ प्रमाणेच, ‘एफ-३५’ हे पाचव्या पिढीतील लढाऊ विमान आहे. अमेरिका बऱ्याच काळापासून भारताला ‘एफ-३५’ विकण्याचा प्रयत्न करत आहे.