न्यू यॉर्क/वॉशिंग्टन : रशियाबरोबर व्यापार करणाऱ्या कोणत्याही देशावर खूप कठोर निर्बंध लादण्याचा इशारा अमेरिकेचे अध्यक्ष डोनाल्ड ट्रम्प यांनी पुन्हा एकदा दिला आहे. कठोर निर्बंध लादले जाणाऱ्या देशांच्या यादीत भारत आणि चीन यांचा समावेश आहे. रशियाबरोबर व्यापार करणाऱ्या कोणत्याही देशावर खूप कठोर निर्बंध लादण्याबाबतचा कायदा रिपब्लिकन पक्ष घेऊन येत आहे, असेही ट्रम्प म्हणाले.
रशियाबरोबर व्यापार करणाऱ्या देशांवर निर्बंध लादणाऱ्या विधेयकाला पाठिंबा देण्यास आपण तयार असल्याचे ट्रम्प यांनी म्हटले आहे. त्यामुळे भारतावर पुन्हा टॅरिफ बॉम्ब पडणार असल्याची शक्यता वर्तविण्यात येत आहे. रशियाचे व्यापार भागीदार देश, विशेषतः रशियाकडून ऊर्जेची आयात करणारे देश हे युक्रेनविरोधात सुरू असलेल्या युद्धाला पाठबळ देण्यास जबाबदार आहेत, असे ट्रम्प यांचे मत आहे.
भारतावर आधीच ५० टक्के टॅरिफ
रशियाबरोबर व्यापारी संबंध सुरूच ठेवलेल्या या दोन देशांवर ट्रम्प हे आधीपासूनच टीका करत आले आहेत. तसेच ट्रम्प यांनी यापूर्वीच भारत आणि चीन या देशांना रशियाच्या युक्रेनविरोधातील युद्धाला पैसा पुरवणारे प्रमुख देश घोषित केले आहे. असे असले तरी अमेरिकेने चीनला फक्त धमक्या दिल्या आहेत. चीनवर कोणतीही दंडात्मक कारवाई झालेली नाही. त्याउलट रशियाकडून तेल खरेदी सुरू ठेवल्याच्या मुद्द्यावर भारतीय मालाच्या आयातीवर दंड म्हणून २५ टक्के अतिरिक्त टॅरिफ लादण्यात आले आहे. ज्यामुळे भारतीय मालावरील एकूण टॅरिफ ऑगस्ट महिन्यात ५० टक्के झाले आहे.
इराणचाही समावेश?
या यादीत भारत आणि चीन यांची नावे जवळपास निश्चित मानली जात असताना, ट्रम्प यांनी, कदाचित ते या यादीत इराणचा समावेश करण्याचाही विचार करू शकतात, असे सांगितले. ट्रम्प अधिक निर्बंध आणि टॅरिफ लादण्याचा विचार करत असताना, दुसरीकडे शुक्रवारी त्यांनी बीफसह २० फूड प्रॉडक्ट्सवरील टॅरिफ हटवले आहेत. वाढत्या किराणामालाच्या किमतीमुळे ग्राहकांकडून नाराजी व्यक्त केली जात असल्याच्या पार्श्वभूमीवर हा निर्णय घेण्यात आला आहे. हे टॅरिफ हटवल्याने भारताला दिलासा मिळाला आहे. कारण ट्रम्प यांनी टॅरिफ दुप्पट केल्यानंतर भारतातील चहा, कॉफी, मसाले आणि काजू निर्यातदारांना मोठा फटका बसला होता.
विधेयकात काय?
रिपब्लिकन पक्षाचे संबंधित विधेयक जर मंजूर झाले तर जे देश रशियाकडून ऊर्जा उत्पादनांची आयात करत आहेत आणि युक्रेनला पाठिंबा देत नाहीत, अशा देशांवर ट्रम्प यांना ५०० टक्क्यांपर्यंत टॅरिफ लादता येईल. यापूर्वी ट्रम्प यांनी या विधेयकाला पाठिंबा देण्यास संकोच दाखवला होता, कारण रशियाचे राष्ट्राध्यक्ष व्लादिमीर पुतिन यांच्याबरोबर शांतता आणि युक्रेनबरोबर युद्धबंदी करार करण्यासाठी त्यांचे प्रयत्न सुरू होते. पण आता या चर्चा फिस्कटल्याने, रशियाला शांतता करार करण्यासाठी भाग पाडता यावे याकरिता ट्रम्प हे या विधेयकाला पाठिंबा देण्याचा विचार करत आहेत.