गणेशोत्सवात बाप्पाच्या स्वागतासाठी प्रत्येक कुटुंब आपापल्या परीने घराची आकर्षक सजावट करतं. यासाठी दरवर्षी वेगवेगळ्या कल्पक थीम साकारल्या जातात. यंदा एका कुटुंबाने मात्र गणपती सजावटीसाठी चक्क लोकप्रिय मालिका 'तारक मेहता का उल्टा चष्मा' मधील गोकुळधाम सोसायटीची थीम साकारली आहे. संपूर्ण घराला गोकुळधाम सोसायटीचा रंग देत बाप्पाचं आगळ्या पद्धतीने स्वागत करण्यात आलं आहे.
या अनोख्या सजावटीचा व्हिडीओ सध्या सोशल मीडियावर चर्चेत आहे. मालिकेतील प्रसिद्ध व्यक्तिरेखा, त्यांचे संवाद आणि मालिकेशी संबंधित अनेक प्रसंग या सजावटीत हुबेहूब साकारण्यात आले आहेत. त्यामुळे घरात प्रवेश करताच जणू काही 'तारक मेहता का उल्टा चष्मा'च्या गोकुळधाम सोसायटीत आल्याचा अनुभव मिळतो.
प्रवेशद्वारापासूनच दिसते 'गोकुळधाम'ची झलक
या थीमची सुरुवात घराच्या प्रवेशद्वारापासूनच होते. खास तयार करण्यात आलेल्या प्रवेशद्वारावर 'गोकुळधाम सोसायटीतर्फे रुपरेल आणि कावा कुटुंबाचे स्वागत' असा संदेश देण्यात आला आहे. त्यासोबत मालिकेतील लोकप्रिय व्यक्तिरेखांची व्यंगचित्रं आणि त्यांचे गाजलेले संवादही लावण्यात आले आहेत.
याशिवाय आणखी एका प्रवेशद्वारासारख्या सजावटीवर मालिकेतील विविध व्यक्तिरेखांची छायाचित्रं पाहायला मिळतात. त्यामुळे आतमध्ये साकारण्यात आलेल्या थीमची उत्सुकता प्रवेशद्वारापासूनच वाढते.
पोपटलालच्या 'मॅट्रिमोनियल कॉर्नर'चीही झलक
घरातील एका भागात पोपटलालच्या व्यक्तिरेखेवर आधारित खास 'मॅट्रिमोनियल कॉर्नर' तयार करण्यात आला आहे. मालिकेत पोपटलालकडून सुरू असलेले लग्नाचे प्रयत्न आणि जोडीदार शोधण्याचे अनेक किस्से या सजावटीतून दाखवण्यात आले आहेत.
पोपटलालच्या व्यक्तिरेखेचे काही गाजलेले प्रसंगही या कोपऱ्यात साकारण्यात आले आहेत. त्यामुळे या भागाला विनोदी आणि हटके अंदाज आला आहे.
जेठालालचं 'गडा इलेक्ट्रॉनिक्स' ही साकारलं
पोपटलालच्या कॉर्नरनंतर जेठालालच्या चाहत्यांसाठी 'गडा इलेक्ट्रॉनिक्स' ची खास झलक पाहायला मिळते. दुकानाचं नाव, मोठा टेलिव्हिजन, जेठालाल आणि त्याच्या कर्मचाऱ्यांची व्यंगचित्रं अशा अनेक गोष्टी या भागात साकारण्यात आल्या आहेत.
'गडा इलेक्ट्रॉनिक्स' ची ही छोटेखानी प्रतिकृती पाहून मालिकेतील प्रसिद्ध दुकानाची आठवण होते. सजावटीतील प्रत्येक भागात मालिकेतील बारकावे जपण्याचा प्रयत्न करण्यात आला आहे.
गोकुळधामच्या मध्यभागी बाप्पा विराजमान
या संपूर्ण सजावटीचं मुख्य आकर्षण म्हणजे गोकुळधाम सोसायटीची साकारलेली प्रतिकृती. बाल्कनीसह संपूर्ण सोसायटीचा छोटेखानी सेट तयार करण्यात आला असून, त्यात मालिकेतील विविध व्यक्तिरेखांचे कटआउट्सही लावण्यात आले आहेत.
याच गोकुळधाम सोसायटीच्या मध्यभागी बाल गणेशाच्या रूपातील गणपती बाप्पाची मूर्ती विराजमान करण्यात आली आहे. रंगीबेरंगी सजावट, मालिकेतील व्यक्तिरेखा आणि गोकुळधामचा सेट यामुळे या गणपती सजावटीला एक वेगळाच अंदाज आला आहे.
सोशल मीडियावर व्हायरल होत असलेल्या या सजावटीच्या व्हिडीओला नेटकऱ्यांकडूनही चांगला प्रतिसाद मिळत आहे. मालिकेच्या चाहत्यांसाठी ही सजावट जुन्या आठवणींना उजाळा देणारी ठरत असून, गणपती बाप्पाच्या स्वागताची ही हटके कल्पना अनेकांचे लक्ष वेधून घेत आहे.