गुगलने आपल्या Google Photos अ‍ॅपमध्ये 'Video Remix' हे नवे एआय (AI) फीचर आणले आहे. या फीचरच्या मदतीने कोणताही साधा व्हिडीओ काही टॅप्समध्ये आकर्षक आणि वेगळ्या स्टाइलमध्ये बदलता येणार आहे. व्हिडीओचा प्रकाश (Lighting) बदलणे, पार्श्वभूमी (Background) बदलणे किंवा वॉटरकलर, स्केच, ऑइल पेंटिंगसारखे इफेक्ट्स देणे आता अवघ्या काही टॅपमध्ये शक्य होणार आहे.

'Video Remix' फीचर नेमकं काय आहे?

हे फीचर Google Photos अ‍ॅपमधील Create टॅबमध्ये उपलब्ध आहे. याच्या मदतीने व्हिडीओ एडिट करण्यासाठी वेगळे सॉफ्टवेअर किंवा तांत्रिक ज्ञान असण्याची गरज नाही. फक्त हवा तो इफेक्ट किंवा टेम्पलेट निवडा आणि एआय काही मिनिटांत तुमच्या व्हिडीओला नवीन लूक देईल.

उदाहरणार्थ, घरात शूट केलेला साधा व्हिडीओ अधिक उजळ आणि आकर्षक दिसू शकतो. तसेच व्हिडीओला स्केच, वॉटरकलर, ऑइल पेंटिंग किंवा सिनेमॅटिक स्टाइलसारखा कलात्मक लूकही देता येतो.

हे फीचर कसं काम करतं?

हे फीचर Google च्या Gemini Omni AI मॉडेलवर आधारित आहे. एआय व्हिडीओतील दृश्य समजून घेतो आणि निवडलेल्या स्टाइलनुसार त्यात आवश्यक बदल करतो. त्यामुळे वापरकर्त्याला क्लिष्ट एडिटिंग करण्याची गरज पडत नाही.

10 सेकंदांच्या व्हिडीओलाच सपोर्ट

सध्या Video Remix फीचर 10 सेकंदांपर्यंतच्या व्हिडीओंना सपोर्ट करते. जर व्हिडीओ यापेक्षा मोठा असेल, तर त्यातील 10 सेकंदांचा भाग निवडावा लागतो. त्यानंतर एआय त्या भागावर प्रक्रिया करून एडिट केलेली नवीन क्लिप तयार करते. ही प्रक्रिया पूर्ण होण्यासाठी काही मिनिटे लागू शकतात.

कोणाला मिळणार हे फीचर?

सध्या Google AI Plus, Pro आणि Ultra सबस्क्रिप्शन असलेल्या वापरकर्त्यांसाठी हे फीचर उपलब्ध करण्यात आले आहे. भारत, अमेरिका, जपान, ब्राझील, मेक्सिको, दक्षिण कोरिया, तुर्की, बांगलादेश, पाकिस्तान, इंडोनेशिया, फिलिपिन्स, इजिप्त आणि इतर काही देशांमध्ये याचा वापर करता येणार आहे.

Google Photos मध्ये आणखी AI फीचर्स

यापूर्वीही गुगलने Google Photos मध्ये एआय-आधारित फोटो टच-अप फीचर्स उपलब्ध करून दिली आहेत. याच्या मदतीने त्वचेवरील डाग कमी करणे, फोटो अधिक आकर्षक बनवणे, डोळे आणि दात अधिक उजळ दिसण्यासाठी एडिटिंग करता येते. याशिवाय कपड्यांचे फोटो व्यवस्थित साठवण्यासाठी डिजिटल वॉर्डरोब फीचरही सादर करण्यात आले आहे. आता Video Remix मुळे Google Photos हे केवळ फोटो-व्हिडीओ साठवण्याचे अ‍ॅप न राहता, झटपट आणि सोपे एआय एडिटिंग करण्यासाठीही उपयुक्त ठरत आहे.

(इंग्रजी बातमी वाचण्यासाठी येथे क्लिक करा.)