वीकेंड पार्टी, संध्याकाळचा चहा किंवा घरात आलेल्या पाहुण्यांसाठी काहीतरी झटपट आणि चविष्ट बनवायचे असेल, तर पनीर शेजवान ब्रेड रोल हा उत्तम पर्याय ठरू शकतो. पनीर, भाज्या आणि शेजवान सॉसच्या मसालेदार चवीमुळे हा स्नॅक लहानांपासून मोठ्यांपर्यंत सर्वांनाच आवडतो. बाहेरून कुरकुरीत आणि आतून मऊसर असलेले हे ब्रेड रोल अवघ्या काही मिनिटांत तयार होतात.
साहित्य :
२५० ग्रॅम किसलेले किंवा चुरलेले पनीर
१/२ कप बारीक चिरलेला कांदा
१/२ कप बारीक चिरलेली ढोबळी मिरची
२ टेबलस्पून शेजवान सॉस
१ टीस्पून आले-लसूण पेस्ट
२ टीस्पून सोया सॉस
१ ते २ टीस्पून तेल
चवीनुसार मीठ
कोथिंबीर (सजावटीसाठी)
५ ते ६ ब्रेड स्लाइसेस
तळण्यासाठी तेल
आवश्यकतेनुसार पाणी
कृती :
कढईत तेल गरम करून त्यात आले-लसूण पेस्ट घाला. काही सेकंद परतल्यानंतर त्यात कांदा आणि ढोबळी मिरची घालून चांगले परता.आता त्यात चुरलेले पनीर, सोया सॉस, शेजवान सॉस आणि मीठ घाला. सर्व साहित्य एकजीव करून काही मिनिटे शिजवा. शेवटी कोथिंबीर घालून मिश्रण थंड होण्यासाठी बाजूला ठेवा.
ब्रेडच्या कडा काढून टाका आणि लाटण्याच्या मदतीने ब्रेड हलका लाटून घ्या. एका ब्रेडवर तयार केलेले सारण ठेवा आणि त्यावर दुसरी ब्रेड स्लाइस ठेवून झाका. ब्रेडच्या कडा पाण्याच्या मदतीने व्यवस्थित सील करा. त्यानंतर कमी ते मध्यम आचेवर शॅलो फ्राय करा. ब्रेड रोल सोनेरी आणि कुरकुरीत झाल्यावर बाहेर काढा.गरमागरम पनीर शेजवान ब्रेड रोल हिरवी चटणी किंवा टोमॅटो सॉसबरोबर सर्व्ह करा.
टिप्स :
अधिक तिखट चव हवी असल्यास शेजवान सॉसचे प्रमाण वाढवू शकता.
रोल अधिक कुरकुरीत करण्यासाठी ब्रेडवर हलके बटर लावू शकता.
सारण पूर्णपणे थंड झाल्यावरच ब्रेडमध्ये भरावे, अन्यथा ब्रेड ओलसर होऊ शकतात.
एअर फ्रायरमध्येही हे रोल कमी तेलात तयार करता येतात.
गाजर, स्वीट कॉर्न किंवा कोबीसारख्या भाज्याही सारणात घालू शकता.
फक्त ३० मिनिटांत तयार होणारा हा पनीर शेजवान ब्रेड रोल वीकेंड पार्टी किंवा मुलांच्या टिफिनसाठीही उत्तम पर्याय ठरू शकतो.