दिवसभराच्या धावपळीनंतर संध्याकाळी काहीतरी चटपटीत, झटपट आणि वेगळं खावंसं वाटतं. अशावेळी नेहमीचे वडा-पाव, सँडविच किंवा भेळ यांना ब्रेक देऊन एक नवा पदार्थ ट्राय करू शकता. घरच्या घरी सहज तयार होणारे पनीर स्लायडर्स हा त्यासाठी उत्तम पर्याय आहे.
मऊ लादीपाव, मसालेदार पनीरची भरपूर स्टफिंग, चटणी, सॉस आणि वितळलेलं चीज यामुळे हा पदार्थ लहानांपासून मोठ्यांपर्यंत सर्वांनाच आवडतो. घरातील छोट्या पार्टीसाठी, किटी पार्टीसाठी किंवा मुलांच्या टिफिनसाठीही हा पदार्थ परफेक्ट ठरू शकतो. कमी वेळात आणि कमी साहित्यांत तयार होणारी ही रेसिपी नक्की करून पाहा.
साहित्य
लादीपाव - ६ ते ८
पनीर - २०० ग्रॅम (किसलेले किंवा छोटे तुकडे)
कांदा - १ बारीक चिरलेला
ढोबळी मिरची - १ बारीक चिरलेली
बटर - २ ते ३ चमचे
तेल - १ चमचा
शेजवान सॉस / पिझ्झा सॉस - २ चमचे
मेयोनेझ - १ चमचा (ऐच्छिक)
चीज स्लाइस किंवा किसलेले चीज
लाल तिखट - अर्धा चमचा
ओरेगॅनो - १ चमचा
चिली फ्लेक्स - अर्धा चमचा
मीठ - चवीनुसार
हिरवी चटणी - २ चमचे
कृती
सुरुवातीला कढईत तेल आणि थोडं बटर गरम करून त्यात कांदा व ढोबळी मिरची हलके परतून घ्या. भाज्या जास्त शिजवू नका, थोडा कुरकुरीतपणा राहू द्या.
यानंतर त्यात पनीर, सॉस, लाल तिखट, ओरेगॅनो, चिली फ्लेक्स आणि मीठ घालून सर्व मिश्रण छान हलवा. दोन मिनिटांनी गॅस बंद करा.
आता लादीपाव आडवे कापून खालच्या भागावर हिरवी चटणी आणि वरच्या भागावर मेयोनेझ लावा. मध्ये तयार पनीरचं मिश्रण भरा. त्यावर चीज टाका आणि वरचा भाग ठेवून बंद करा.
पॅनमध्ये बटर गरम करून स्लायडर्स मंद आचेवर दोन्ही बाजूंनी भाजा. चीज वितळलं की गरमागरम स्लायडर्स तयार.
टोमॅटो सॉस किंवा चटणीसोबत सर्व्ह करा आणि घरच्यांसोबत मजा घ्या.