सकाळच्या नाश्त्याला पोहे हा अनेकांचा आवडता पदार्थ असतो. हलके, चविष्ट आणि पटकन तयार होणारे पोहे आरोग्यासाठीही फायदेशीर मानले जातात. मात्र, पोहे बनवताना अनेकदा ते चिकट होतात किंवा खूपच कडक पडतात. अशावेळी पोह्यांची चव आणि पोत दोन्ही बिघडते. काही सोप्या टिप्स फॉलो केल्यास तुम्ही प्रत्येक वेळी मोकळे, मऊ आणि चविष्ट पोहे तयार करू शकता.

साहित्य

• २ कप जाड पोहे

• १ मोठा कांदा (बारीक चिरलेला)

• २ हिरव्या मिरच्या

• ८ ते १० शेंगदाणे

• १/२ चमचा मोहरी

• १/२ चमचा जिरे

• कढीपत्ता

• १/४ चमचा हळद

• चवीनुसार मीठ

• १ चमचा साखर

• १ चमचा लिंबाचा रस

• कोथिंबीर

• २ चमचे तेल

कृती

सर्वप्रथम पोहे चाळणीत घेऊन स्वच्छ पाण्याखाली एक-दोन वेळा धुवून घ्या. पोहे जास्त वेळ पाण्यात भिजवू नका. धुतल्यानंतर त्यांना काही मिनिटे तसेच ठेवा, त्यामुळे ते योग्य प्रमाणात मऊ होतात.

कढईत तेल गरम करून शेंगदाणे कुरकुरीत भाजून घ्या आणि बाजूला काढा. त्याच तेलात मोहरी, जिरे, कढीपत्ता आणि हिरव्या मिरच्यांची फोडणी द्या. त्यानंतर कांदा घालून हलका गुलाबी होईपर्यंत परतून घ्या.

आता हळद आणि मीठ घालून त्यात पोहे मिसळा. पोहे ढवळताना जास्त जोर लावू नका. त्यानंतर भाजलेले शेंगदाणे, साखर, लिंबाचा रस आणि कोथिंबीर घालून सर्व साहित्य एकजीव करा.

झाकण ठेवून दोन मिनिटे मंद आचेवर वाफ येऊ द्या. तयार झालेले गरमागरम पोहे सर्व्ह करा.

परफेक्ट पोह्यांसाठी फॉलो करा या सीक्रेट टिप्स

• जाड पोहे वापरल्यास ते मोकळे राहतात.

• पोहे धुतल्यानंतर लगेच शिजवू नका.

• जास्त वेळ गॅसवर ठेवल्यास पोहे कडक होऊ शकतात.

• शेवटी लिंबाचा रस घातल्याने चव अधिक खुलते.

• पोहे मिसळताना हलक्या हाताने ढवळा.

या छोट्या टिप्स फॉलो केल्यास नाश्त्याचे पोहे प्रत्येक वेळी मऊ, मोकळे आणि चविष्ट होतील.