आजच्या धावपळीच्या जीवनशैलीत आरोग्यदायी आणि झटपट तयार होणाऱ्या पदार्थांना मोठी मागणी आहे. अशातच कमी कॅलरी, जास्त प्रोटीन आणि फायबरने भरलेले मखाना (Fox Nuts) आरोग्याबाबत जागरूक असलेल्या लोकांची पहिली पसंती ठरत आहेत. वजन कमी करायचे असो, मधुमेह नियंत्रणात ठेवायचा असो किंवा हेल्दी स्नॅक असो, भाजलेले मखाना हा उत्तम पर्याय मानला जात आहे. घरी अगदी कमी वेळेत आणि कमी साहित्य वापरून मखाना कसे भाजायचे, जाणून घेऊया ही सोपी रेसिपी.
साहित्य :
२ कप मखाना
१ ते २ चमचे तूप (किंवा तेल)
मीठ - चवीनुसार
काळी मिरी पावडर - अर्धा चमचा
लाल तिखट - अर्धा चमचा (ऐच्छिक)
चाट मसाला / ओवा पावडर - चवीनुसार
कृती :
कढई मंद आचेवर ठेवा आणि त्यात तूप घाला. तूप वितळल्यानंतर त्यात मखाना घालून सतत हलवत राहा आणि भाजून घ्या. मखाना कुरकुरीत होईपर्यंत (५-७ मिनिटे) भाजत राहा. गॅस बंद करून त्यात मीठ, मिरी, तिखट आणि चाट मसाला घाला. सर्व मसाले नीट मिसळा. थंड झाल्यावर हवाबंद डब्यात भरून ठेवा. हेल्दी, कुरकुरीत आणि स्वादिष्ट रोस्टेड मखाना तयार!
आरोग्यासाठी उपयुक्त
मखाना खाल्ल्याने वजन नियंत्रणात ठेवण्यास मदत होते. मधुमेह रुग्णांसाठी मखाना उपयुक्त ठरतो. याच्या सेवनाने पचन सुधारते तसेच हे हृदयासाठी फायदेशीर आहे.