नाशिक : महिलांचे लैंगिक शोषण करणाऱ्या भोंदू बाबा अशोक खरात याचे पाय विविध गुन्ह्यांप्रकरणी अधिक खोलवर जात आहेत. खरातवच्या जीवाला धोका असल्याने गुरूवारची न्यायालयीन सुनावणी अत्यंत कडक बंदोबस्तात आणि ‘व्हिडिओ कॉन्फरन्सिंग’द्वारे पार पडली. विशेष तपास पथकाने मांडलेला युक्तिवाद ग्राह्य धरत न्यायालयाने खरातला ८ एप्रिलपर्यंत पोलिस कोठडी सुनावली आहे.
तपास अधिकारी किरण कुमार सूर्यवंशी यांनी सुरक्षेच्या कारणास्तव खरातला न्यायालयात आणणे जोखमीचे असल्याचे अर्जाद्वारे कळवले होते. न्यायालयाने ही विनंती मान्य केल्याने कोर्ट रूममध्ये चार मोठे स्क्रीन बसवून सुनावणी पार पडली.
तपासात धक्कादायक बाब समोर आली आहे की, खरात हा पीडितेच्या नातेवाईकांकडे वारंवार आधार कार्ड आणि पॅन कार्डची मागणी करत होता. याद्वारे तो संबंधितांची मालमत्ता स्वतःच्या नावावर हडपण्याच्या बेतात होता का? या दिशेने आता ‘एसआयटी’ने तपासाची चक्रे फिरवली आहेत. आरोपी तपासात सहकार्य करत नसल्याचा दावाही सरकारी पक्षाने केला.