एफपीजे सिटी डेस्क/मुंबई
राज्य सामायिक प्रवेश परीक्षा कक्षाने शैक्षणिक वर्ष २०२६-२७ साठी चार वर्षांच्या ‘बॅचलर ऑफ फाईन आर्ट’ (बीएफए) अभ्यासक्रमाच्या ऑनलाईन नोंदणी प्रक्रियेला सुरुवात केली आहे.
केंद्रीय प्रवेश प्रक्रियेअंतर्गत होणाऱ्या या प्रवेशासाठी पात्र उमेदवारांना ७ जुलै ते १४ जुलै या कालावधीत आपले अर्ज ऑनलाईन सादर करता येतील, अशी माहिती ‘सीईटी सेल’ने प्रसिद्ध केलेल्या अधिकृत अधिसूचनेत देण्यात आली आहे.
या प्रक्रियेत ऑनलाईन नोंदणी, कागदपत्रे अपलोड करणे, निश्चित केलेल्या छाननी केंद्रांवर जाऊन मूळ कागदपत्रांची पडताळणी करणे, अर्ज निश्चित करणे आणि त्यानंतर महाविद्यालय निवडीचा पर्याय भरणे या टप्प्यांचा समावेश आहे.
विद्यार्थ्यांनी जवळच्या छाननी केंद्रावर जाऊन प्रत्यक्ष कागदपत्र पडताळणी पूर्ण करणे बंधनकारक असून, त्याशिवाय त्यांचा अर्ज केंद्रीय प्रवेश प्रक्रियेसाठी वैध मानला जाणार नाही.
या प्रवेश प्रक्रियेसाठी महाराष्ट्र, अखिल भारतीय स्तर तसेच जम्मू-काश्मीर आणि लडाख या केंद्रशासित प्रदेशांतील उमेदवार अर्ज करू शकतात. अर्जदारांनी उच्च माध्यमिक प्रमाणपत्र परीक्षा म्हणजेच बारावी किंवा त्यासमकक्ष परीक्षा इंग्रजी विषयासह उत्तीर्ण केलेली असावी. तसेच खुल्या प्रवर्गातील उमेदवारांसाठी किमान ४५ टक्के आणि महाराष्ट्रातील राखीव प्रवर्गातील उमेदवारांसाठी किमान ४० टक्के गुण अनिवार्य आहेत.
प्रवेशाचे वेळापत्रक
‘सीईटी सेल’ने जाहीर केलेल्या वेळापत्रकानुसार, प्रत्यक्ष कागदपत्र पडताळणी ८ जुलै ते १५ जुलै दरम्यान चालणार असून ११ आणि १२ जुलै रोजी ही पडताळणी बंद राहील. त्यानंतर १७ जुलै रोजी साडेपाच वाजल्यानंतर तात्पुरती गुणवत्ता यादी जाहीर केली जाईल. या यादीवर हरकती नोंदवण्यासाठी १८ ते २० जुलैचा वेळ दिला असून, अंतिम गुणवत्ता यादी २१ जुलै रोजी प्रसिद्ध होईल.