हिंगोली : दिल्लीतील जंतरमंतर येथे जाऊन तिरंगा फडकवणारे ‘कॉकरोच जनता पार्टी’चे (सीजेपी) तीन नेते सध्या दिल्ली पोलिसांच्या बेकायदेशीर ताब्यात असून, ही कृती म्हणजे एकप्रकारचे ‘अपहरण’ असल्याचा गंभीर आरोप सीजेपीचे संस्थापक अभिजीत दिपके यांनी मंगळवारी केला. तसेच, दिल्ली पोलीस वकिलांनाही या नेत्यांना भेटू देत नसल्याचा आरोपही त्यांनी केला.
जंतरमंतरवर कडेकोट बंदोबस्त आणि मोठा पोलीस फौजफाटा असतानाही सीजेपीचे नेते सौरव दास आणि आशुतोष रांका यांनी मंगळवारी जंतरमंतर गाठले होते, त्यानंतर पोलिसांनी त्यांना ताब्यात घेतले. अजिंक्य शिंदे या इतर सहकाऱ्यालाही पोलिसांनी ताब्यात घेतल्याचे अभिजीत दिपके यांनी सांगितले.
दिपके म्हणाले की, जर आंदोलनांवर बंदी घातली, तर संपूर्ण देशात आंदोलनांचे रस्ते उभे राहतील. पंतप्रधान नरेंद्र मोदी आणि केंद्रीय गृहमंत्री अमित शहा हे लोकशाहीतील असंतोष दाबण्याचा प्रयत्न करत आहेत, असा आरोप त्यांनी केला. नरेंद्र मोदींना आंदोलनाच्या ठिकाणाबाबत नाही, तर लोकांच्या आंदोलनाच्या कल्पनेविषयीच समस्या आहे, ही हुकूमशहाची लक्षणे आहेत, असे ते म्हणाले.
आंदोलन सुरूच
निवडणूक आयुक्त ज्ञानेश कुमार यांच्या राजीनाम्याची मागणी करण्यासाठी ते बुधवारी स्वतः राष्ट्रीय राजधानी दिल्लीत दाखल होणार आहेत. "जर पोलिसांनी मला दिल्लीच्या मार्गावर रोखले, तर पोलीस मला जेथे अडवतील किंवा ताब्यात घेतील, तेथूनच मी आंदोलनाला सुरुवात करीन. निवडणूक आयुक्तांचा राजीनामा मिळेपर्यंत सीजेपीचे आंदोलन सुरूच राहील, असा इशाराही त्यांनी दिला.