कल्पेश म्हामुणकर/ मुंबई

राज्यातील कायदा व सुव्यवस्था, पोलीस प्रशासन आणि महत्त्वपूर्ण विभागांमधील समन्वय अधिक मजबूत करण्याच्या उद्देशाने महाराष्ट्र गृह विभागाने मंगळवारी राज्यातील १३ वरिष्ठ भारतीय पोलीस सेवा (आयपीएस) अधिकाऱ्यांच्या बदल्यांचे आदेश जारी केले. या व्यापक प्रशासकीय फेरबदलामुळे पुणे, ठाणे, नवी मुंबई आणि नागपूरसह अनेक महत्त्वाच्या सुरक्षा, प्रशासकीय आणि वाहतूक विभागांवर परिणाम झाला आहे. यामध्ये प्रामुख्याने अमरसिंह जाधव (जे आतापर्यंत नवी मुंबईत ‘डायल ११२’चे पोलीस अधीक्षक म्हणून कार्यरत होते) यांची ठाणे शहरात पोलीस उपायुक्त (डीसीपी) पदावर बदली करण्यात आली आहे. त्यांच्या जागेवर आता रूपाली अंबुरे यांची नवी मुंबई ‘डायल ११२’च्या नवीन पोलीस अधीक्षक म्हणून नियुक्ती करण्यात आली. तसेच वसई-विरारमध्ये पोलीस उपायुक्त म्हणून कार्यरत असलेले अमोल झेंडे यांची आता पुणे महानगर प्रदेश विकास प्राधिकरण (पीएमआरडीए) येथे पोलीस अधीक्षक (एसपी) म्हणून नियुक्ती करण्यात आली आहे. संदीप पालवे यांच्याकडे छत्रपती संभाजीनगरच्या पोलीस अधीक्षक पदाची धुरा सोपवण्यात आली आहे.

वरिष्ठ आयपीएस अधिकारी विनीता साहू यांची नागपूर शहराच्या अप्पर पोलीस आयुक्तपदी तर राज्य राखीव पोलीस बल (एसआरपीएफ), दहशतवाद विरोधी पथक (एटीएस) मुंबई, महामार्ग सुरक्षा (हायवे सिक्युरिटी) आणि पोलीस प्रशिक्षण विभागांमधील इतर वरिष्ठ अधिकाऱ्यांचाही या फेरबदलात समावेश आहे.