धाराशिव : काही दिवसांपूर्वी छत्रपती संभाजीनगरमधील खवड्या डोंगरावर एकाच कुटुंबातील तिघांचा डोंगरावरून खाली कोसळून मृत्यू झाल्याची दुर्दैवी घटना ताजी असतानाच, आता धाराशिवमधूनही तितकाच धक्कादायक प्रकार समोर आला आहे. धाराशिव जिल्ह्यातील नळदुर्ग किल्ल्यावरून एका आईने आपल्या तीन लहान मुलांसह उडी घेतल्याची माहिती समोर आली आहे. या भीषण घटनेत आई आणि तिच्या एका मुलाचा मृत्यू झाला असून, दोन चिमुकल्या मुली गंभीर जखमी झाल्या आहेत.
छत्रपती संभाजीनगरमधील तीसगाव परिसरात असलेल्या खवड्या डोंगरावर काही दिवसांपूर्वी अत्यंत हृदयद्रावक घटना घडली होती. आत्मघाती पाऊल उचलण्याच्या उद्देशाने डोंगरावर गेलेल्या १८ वर्षीय मुलाला वाचवण्यासाठी त्याचे आई-वडील धावले होते. मात्र, मुलाला वाचवण्याच्या प्रयत्नात वडीलही त्याच्यासोबत खाली कोसळले. मुलगा आणि पती डोळ्यांसमोर दरीत पडल्याचा धक्का सहन न झाल्याने आईनेही डोंगरावरून उडी घेतल्याचे समोर आले होते. या घटनेत कुणाल मुरलीधर चांदवडे, मुरलीधर चांदवडे आणि संगीता चांदवडे या तिघांचा मृत्यू झाला होता.