मुंबई : गेल्या दोन दिवसांपासून उघडझाप करणारा पाऊस शुक्रवारी, शनिवारी दमदार बरसला. अधूनमधून मुसळधार बरसणाऱ्या पावसामुळे मुंबईतील अनेक सखल भाग पाण्याखाली गेले, तर अंधेरी सब-वे पाण्याखाली गेल्याने तीन वेळा वाहतुकीसाठी बंद करण्यात आला होता. रस्ते वाहतूक मंदावल्याने ट्राफिक जाम, बेस्ट बस मार्गांत बदल करण्यात आले होते, तर मध्य, हार्बर व पश्चिम रेल्वे मार्गावरील लोकल सेवा १५ ते २० मिनिटं उशिराने धावत होत्या. दरम्यान, रविवारी रत्नागिरी, सिंधुदुर्ग, कोल्हापूर, साताऱ्यात रेड अलर्ट जारी करण्यात आला असून मुंबईत यलो अलर्ट जारी करण्यात आल्याचा इशारा पुणे हवामान विभागाने दिला आहे.
गुरुवार, शुक्रवारपासून मुंबईत कोसळणाऱ्या पावसाचा शुक्रवारी रात्रीनंतर जोर वाढला. धो धो बरसणाऱ्या पावसामुळे मुंबईतील अनेक भाग पाण्याखाली गेल्याने रस्ते वाहतूककोंडी झाली. सायन, वांद्रे येथील नॅशनल कॉलेजजवळील रस्त्यावर पाणी भरल्याने बेस्ट बस मार्गांत बदल करण्यात आले, तर झाडे, झाडांच्या फांद्या कोसळणे, शॉर्टसर्किट, घराचे भाग कोसळणे या घटना कायम असून मुंबईत पडझडीचे सत्र कायम आहे. दरम्यान, पुढील २४ तासांत मुंबईतील काही भागांत मुसळधार, तर काही भागांत अतिमुसळधार पावसाचा अंदाज हवामान विभागाने वर्तवला असून मुंबईत रविवारी यलो अलर्ट जारी करण्यात आले आहे, तर रत्नागिरी, सिंधुदुर्ग, कोल्हापूर, साताऱ्यात रेड अलर्ट जारी करण्यात आले आहे.
> रेड अलर्ट
रत्नागिरी, सिंधुदुर्ग, कोल्हापूर, सातारा
> ऑरेंज अलर्ट
ठाणे, रायगड, पुढील दोन दिवस 'ऑरेंज अलर्ट'
> यलो अलर्ट
मुंबई, पालघर, सांगली, सोलापूर, अहमदनगर, जळगाव