अमरावती : पुरोगामी महाराष्ट्राची मान शरमेने खाली जाईल अशी घटना उजेडात आली आहे. अमरावती जिल्ह्यातील एका गावात काळ्या जादूच्या संशयावरून ७७ वर्षीय महिलेला अमानुष मारहाण करण्यात आली. तिच्या गळ्यात चपलांची माळ घालून तिची धिंड काढण्यात आली. इतकेच नव्हे, तर तिला लघुशंका प्राशन करावयास लावून गरम लोखंडी सळईने डाग देण्याचा धक्कादायक प्रकार घडला आहे.
अमरावतीच्या चिखलदरा तालुक्यातील रेत्याखेडा गावात ३० डिसेंबर रोजी ही घटना घडल्याचे उघडकीस आले आहे. पीडित महिला घरी एकटी असताना शेजाऱ्यांनी तिला काळ्या जादूचा आरोप करून पकडले. तिला लाकडी दांडक्याने मारहाण करण्यात आली. गरम लोखंडी सळईने हात-पाय डागण्यात आले. एवढेच नव्हे, तर तिला लघुशंका प्राशन करावयास लावली. त्यानंतर तिच्या गळ्यात चपलांची माळ घालून तिची धिंड काढण्यात आली.
पीडितेचा मुलगा आणि सून कामानिमित्त बाहेर होते. त्यांना ५ जानेवारीला घटनेची माहिती मिळाली. त्यांनी पोलिसांकडे तक्रार दाखल केली आणि शुक्रवारी वरिष्ठ अधिकाऱ्यांची भेट घेऊन कठोर कारवाईची मागणी केली. जिल्हाधिकारी आणि पोलीस अधीक्षकांना पत्र लिहून या प्रकाराचा तपशील देण्यात आला आहे.
अमरावतीचे पोलीस अधीक्षक विशाल आनंद यांनी सांगितले की, घटना गंभीर आहे. शुक्रवारी तक्रारदारांनी त्यांच्याशी चर्चा केली. गाव जंगल परिसरात असल्याने पोलीस अधिकाऱ्याला सत्यता पडताळण्यासाठी पाठवण्यात आले आहे. तक्रार नोंदवणाऱ्या पोलीस ठाण्याने हा प्रकार दडपण्याचा प्रयत्न केला आहे का, हेही तपासले जाईल. जर उणीव आढळल्यास संबंधित अधिकाऱ्यांवर कारवाई केली जाईल, असे त्यांनी सांगितले.
सामाजिक दुष्कृत्यांवर आवाहन
या घटनेने ग्रामीण भागातील अंधश्रद्धा आणि सामाजिक दुष्कृत्यांवर पुन्हा एकदा लक्ष केंद्रित केले आहे. पोलीस आणि प्रशासनाने योग्य ती कारवाई करून या अमानुष घटनांना आळा घालावा, अशी मागणी होत आहे.