मुंबई : सिगारेट पिण्याच्या वादातून फ्रॉन्सिस ऊर्फ शफी फर्नांडिस या ५१ वर्षांच्या व्यक्तीची चाकूने वार करून हत्या केल्याप्रकरणी सैद इक्बाल शेख या मारेकऱ्याला वांद्रे पोलिसांनी अटक केली. त्याचे इतर सहकारी पळून गेल्याने त्यांच्या अटकेसाठी पोलिसांनी विशेष मोहीम हाती घेतली आहे. ही घटना बुधवारी रात्री ११.४५ वाजता वांद्रे येथील चॅपेल रोड, टोनी स्टोअरजवळ घडल्याचे पोलिसांनी सांगितले. शफी हा वांद्रे येथे त्याच्या कुटुंबीयांसोबत राहतो. बुधवारी रात्री सिगारेट पिण्यावरून त्याचा सैदसोबत वाद झाला होता. या वादानंतर सैदसह त्याच्या मित्रांनी त्याच्यावर चाकूने वार केले होते. त्यात तो गंभीररीत्या जखमी झाला होता. जखमी झालेल्या शफीला तातडीने वांद्रे येथील भाभा हॉस्पिटलमध्ये दाखल करण्यात आले होते. तिथे त्याला डॉक्टरांनी मृत घोषित केले. याप्रकरणी शफीची पत्नी झियान फर्नांडिस हिच्या तक्रारीवरून वांद्रे पोलिसांनी हत्येचा गुन्हा नोंदविला होता.