मुंबई : आनंद दिघे महाराष्ट्र ऑटो रिक्षा व मीटर टॅक्सीचालक कल्याणकारी मंडळ स्वायत्त व स्वयंपूर्ण होता यावे, यासाठी राज्य सरकारने मंडळास ५० कोटींचा निधी प्रथमच मंजूर केला आहे. याबाबत मंगळवारी शासन अध्यादेश जारी करण्यात आला आहे.
महाराष्ट्र ऑटो-रिक्षा आणि मीटर टॅक्सीचालक कल्याणकारी मंडळ स्थापन करण्यात आले आहे. या मंडळाकडून ऑटो-रिक्षा आणि मीटर टॅक्सीचालकांना विविध कल्याणकारी योजनांचा लाभ उपलब्ध करून देण्यात येणार आहे. महाराष्ट्र ऑटो-रिक्षा आणि मीटर टॅक्सी चालक कल्याणकारी मंडळ स्वायत्त व स्वयंपूर्ण व्हावे यासाठी शासनाकडून एक वेळचे अनुदान रुपये ५० कोटी उपलब्ध करून देण्यास मंत्रिमंडळाने मान्यता दिली आहे.
त्यानुसार २०२४-२५ या आर्थिक वर्षांत मंजूर अनुदानातून धर्मवीर आनंद दिघे महाराष्ट्र ऑटो-रिक्षा आणि मीटर टॅक्सीचालक कल्याणकारी मंडळासाठी ५० कोटी निधी देण्यास शासन निर्णयान्वये मान्यता देण्यात आली आहे.
हा निधी धर्मवीर आनंद दिघे महाराष्ट्र ऑटो-रिक्षा आणि मीटर टॅक्सीचालक कल्याणकारी मंडळाच्या खात्यामध्ये जमा करण्यासाठी परिवहन आयुक्त, महाराष्ट्र राज्य, मुंबई यांना नियंत्रण अधिकारी आणि मुख्य वित्त व लेखा अधिकारी, परिवहन आयुक्त यांना आहरण आणि संवितरण अधिकारी म्हणून जाहीर करण्यात आले आहे.