भाईंंदर : भाईंदर पश्चिमेतील मुर्धा परिसरात शासकीय जमिनीवर भाजपच्या नगरसेविका नयना म्हात्रे यांचे जनसंपर्क कार्यालय सुरू झाल्याने वाद निर्माण झाला आहे. यापूर्वी महापालिकेने कारवाई करून पाडलेल्या बांधकामाच्या जागेवर पुन्हा बांधकाम करण्यात आल्याचा आरोप स्थानिकांकडून होत आहे. मात्र, संबंधित ठिकाणी नव्याने बांधकाम झाले नसून केवळ पत्र्याने जागा झाकण्यात आल्याचा दावा प्रभाग अधिकाऱ्यांनी केला आहे.
मुर्धा, रेवा आगर परिसरातील सर्व्हे क्रमांक १११ (जुना क्रमांक ३६) ही शासकीय जमीन असल्याचे सांगण्यात येते. या जागेवरील सुमारे ४०० चौरस फुटांचे अनधिकृत बांधकाम मीरा-भाईंदर महापालिकेने उपायुक्त स्वप्नील सावंत यांच्या आदेशानुसार १० जुलै २०२६ रोजी जेसीबीच्या साहाय्याने पाडले होते. महापालिकेच्या मालमत्ता कर नोंदीत या ठिकाणी मे. डॉ. राठी हॉस्पिटॅलिटी यांच्या नावावर एका झोपडीची नोंद असल्याचा दावा करण्यात येत आहे.
दरम्यान, २ ते ४ ऑक्टोबरदरम्यानच्या सार्वजनिक सुट्ट्यांच्या काळात या जागेवर पुन्हा बांधकाम करण्यात आल्याचा आरोप आहे. त्यानंतर येथे प्रभाग क्रमांक २३ च्या भाजप नगरसेविका नयना म्हात्रे यांचे जनसंपर्क कार्यालय सुरू करण्यात आले.
या प्रकारामुळे बांधकामाची वैधता आणि आवश्यक परवानग्यांबाबत प्रश्न उपस्थित होत आहेत. संबंधित प्रकरणाची चौकशी करण्याची मागणी स्थानिक नागरिकांनी केली आहे.
प्रभाग अधिकाऱ्यांचा वेगळाच दावा
या प्रकरणी प्रभाग अधिकारी दिपाली पोवार यांनी सांगितले की, तक्रार प्राप्त झाल्यानंतर घटनास्थळी पाहणी करण्यात आली. कारवाईनंतर कोणतेही नवीन बांधकाम करण्यात आलेले नसून, केवळ पत्र्याच्या सहाय्याने जागा झाकण्यात आल्याचे पाहणीत दिसून आले आहे. त्यामुळे संबंधित जागेची मालकी, बांधकामाची सद्यस्थिती आणि आवश्यक परवानग्यांची अधिकृत पडताळणी महत्त्वाची ठरणार आहे. महापालिका प्रशासन या प्रकरणी पुढे काय भूमिका घेते, याकडे स्थानिकांचे लक्ष लागले आहे.