पूनम अपराज/मुंबई :
महाराष्ट्र लोकसेवा आयोगाच्या (एमपीएससी) औषध निरीक्षक भरती परीक्षेच्या प्रश्नपत्रिका फुटल्याच्या कथित प्रकरणात मुंबई गुन्हे शाखेच्या विशेष तपास पथकाने (एसआयटी) महाराष्ट्र लोकसेवा आयोगातील सहाय्यक कक्ष अधिकारी रोहित कोलटक्के याला नवी मुंबईतून अटक केली आहे.
कोलटक्के याने एमपीएससीचे अवर सचिव अभिजीत लेंडवे यांच्याकडून अडीच लाख रुपये देऊन प्रश्नपत्रिका मिळवल्याचा आरोप आहे. त्याने ही प्रश्नपत्रिका अन्य उमेदवारांना किंवा मध्यस्थांना विकली होती का, याचा तपास गुन्हे शाखेकडून सुरू आहे.
कोलटक्केला आज अटक झाल्याने या प्रकरणातील अटकेतील आरोपींची संख्या १३ झाली आहे. अन्न व औषध प्रशासन विभागांतर्गत औषध निरीक्षक पदाच्या १५४ जागांसाठी एमपीएससीने २२ मार्च २०२६ रोजी महाराष्ट्रातील सहा केंद्रांवर छाननी परीक्षा घेतली होती.
