मुंबई: मध्य रेल्वेने उपनगरी विभागांवर रविवारी मेगा ब्लॉक घेतला आहे. माटुंगा-मुलुंड अप व डाऊन जलद मार्गावर सकाळी ११.०५ वाजल्यापासून दुपारी ३.४५ वाजेपर्यंत हा ब्लॉक असेल.
छत्रपती शिवाजी महाराज टर्मिनस मुंबई येथून सकाळी १०.३६ वाजल्यापासून दुपारी ३.१० वाजेपर्यंत सुटणाऱ्या डाऊन जलद गाड्या माटुंगा स्थानकापासून मुलुंडदरम्यान डाऊन धीम्या मार्गावर वळविण्यात येतील. या गाड्या त्यांच्या निर्धारित थांब्यांवर थांबून त्यांच्या गंतव्यस्थानावर अंदाजे १५ मिनिटे उशिरा पोहोचतील. ठाण्यानंतरच्या जलद गाड्या मुलुंड स्थानकापासून पुन्हा डाऊन जलद मार्गावर वळविण्यात येतील. ठाणे येथून सकाळी ११.०३ वाजल्यापासून दुपारी ३.३८ वाजेपर्यंत सुटणाऱ्या अप जलद गाड्या मुलुंड स्थानकापासून माटुंगा दरम्यान अप धीम्या मार्गावर वळविण्यात येतील व त्यांच्या निर्धारित थांब्यांवर थांबून या गाड्या माटुंगा स्थानकापासून पुन्हा अप जलद मार्गावर वळविण्यात येतील. या गाड्या गंतव्यस्थानावर अंदाजे १५ मिनिटे उशिरा पोहोचतील. पनवेल ते वाशी अप व डाऊन हार्बर मार्गावर सकाळी ११.०५ वाजल्यापासून सायंकाळी ४.०५ वाजेपर्यंत ब्लॉक घेण्यात आला आहे.
ट्रान्स-हार्बरवर या कालावधीतील गाड्या रद्द
पनवेल येथून सकाळी ११.०२ वाजल्यापासून दुपारी ३.५३ वाजेपर्यंत सुटणाऱ्या व ठाण्याकडे जाणाऱ्या अप ट्रान्स-हार्बर मार्गावरील गाड्या तसेच ठाणे येथून सकाळी १०.०१ वाजल्यापासून दुपारी ३.२० वाजेपर्यंत सुटणाऱ्या पनवेलकडे जाणाऱ्या डाऊन ट्रान्स-हार्बर मार्गावरील गाड्या रद्द राहतील.